ស្វាយរៀង ៖ រោងចក្រ អេ អេន ជេ ដែលមានទីតាងនៅក្នុងតំបន់សេដ្ឋកិច្ចពិសេស តាយសេង ក្នុងក្រុងបាវិត ខេត្ត ស្វាយរៀង ត្រូវបានបិទទ្វារ បន្ទាប់ពីរកឃើញកម្មករឆ្លងកូវីដ-១៩ ខណៈកម្មករ នៃរោងចក្រស្មាតថេក នៅ ក្នុងតំបន់សេដ្ឋកិច្ចពិសេសនេះដែរ មិនចូលធ្វើការ ដោយខ្លាចឆ្លងជំងឺ។   

​លោក តូច ប៉ូលីវ៉ា អភិបាលរងខេត្ត និងជាអនុប្រធានគណៈកម្មការស្រាវជ្រាវទប់ស្កាត់ជំងឺកូវីដ- ១៩ ខេត្តស្វាយរៀង បានប្រាប់BTVនៅរសៀលថ្ងៃនេះថា នៅក្នុងរោងចក្រអេ អេន ជេ តំបន់ពិសេស តាយសេង ដែលមានកម្មករបម្រើការងារចំនួនជាងពីរពាន់នាក់នោះ មានកម្មករចំនួន៥៩នាក់ បានឆ្លង កូវីដ-១៩ ក្រោយការតេស្តកាលពីម្សិលមិញ។ អាជ្ញាធរ បានសម្រេចបិទទ្វាររោងចក្រ នេះតែម្ដង។ ចំ ណែកនៅឯរោងចក្រស្មាតថេក នៅក្នុងតំបន់សេដ្ឋកិច្ចពិសេសនោះដែរ គឺកម្មករទាំងអស់ នៃរោងចក្រនេះ ដែលមានចំនួនជាង១ពាន់នាក់ មិនបានចូលធ្វើការទេ ដោយសារភ័យខ្លាចឆ្លង។

លោកបានបញ្ជាក់ថា ក្រុមការងារស្រាវជ្រាវទប់ស្កាត់ជំងឺកូវីដ១៩ខេត្ត សហការជាមួយនឹងថៅកែ រោងចក្រ កំពុងធ្វើការពិភាក្សា ដើម្បីរកដំណោះស្រាយបង្កលក្ខណៈឱ្យកម្មករចូលបម្រើការវិញ។

លោកវេជ្ជបណ្ឌិត អ៊ឹម បុត្រ ប្រធានក្រុមការងារចត្តាឡីស័កច្រកទ្វារព្រំដែនអន្តរជាតិបាវិត បាន ប្រាប់BTVដែរថា មកទល់ពេលនេះ ទាំងអ្នកមានជំងឺកូវីដ-១៩ និងអ្នកពាក់ព័ន្ធ ត្រូវបានបញ្ជូនទៅព្យា បាល និងដាក់ឱ្យធ្វើចត្តាឡីស័កត្រឹមត្រូវអស់ហើយ។

​ក្រុមកម្មកររោងចក្រស្មាតថេក ដែលមិនចូលធ្វើការងារ នៅថ្ងៃទី២៧ ខែឧសភា នេះ បាន បញ្ជាក់ ថា រោងចក្រនេះ មិនមានកម្មករណាម្នាក់មានជំងឺកូវីដ១៩នោះទេ។ ពួកគេ មិនចូលធ្វើការ ដោយសារ ខ្លាចឆ្លងជំងឺកូវីដ-១៩ ព្រោះកម្មករខ្លះ មានទំនាក់ទំនងជាមួយនឹងកម្មករ នៃរោងចក្រអេអេនជេ។

​កាលពីម្សិលមិញ កម្មករោងចក្រក្នុងតំបន់សេដ្ឋកិច្ចពិសេសតាយសេងរាប់រយនាក់ បាននាំគ្នា សម្រុកចេញពីរោងចក្រ ក្រោយការរកឃើញវិជ្ជមានកូវីដ-១៩លើកកម្មកររាប់សិបនាក់ នៅក្នុងរោងចក្រអេ អេនជេ។ អាជ្ញាធរខេត្ត នៅថ្ងៃនេះ បានធ្វើការអំពាវនាវដល់អ្នកពាក់ព័ន្ធទាំងអស់ ត្រូវដាក់ខ្លួនដាច់ដោយ ឡែក និងតាមដានសុខភាពខ្លួន បើមានអ្វីប្រែប្រួល ត្រូវជូនដំណឹងទៅអាជ្ញាធរជាបន្ទាន់។

របាយការណ៍របស់រដ្ឋបាលខេត្តស្វាយរៀង បានបង្ហាញថា ចាប់តាំងពីព្រឹត្តិការណ៍សហគមន៍២០ កុម្ភៈមក នៅខេត្តស្វាយរៀង មានពលរដ្ឋខ្មែរ និងជនបរទេស កើតជំងឺកូវីដ-១៩ ប្រមាណជាង៥០០នាក់ តែចំនួនជាង៣០០នាក់ បានជាសះស្បើយហើយ៕ អត្ថបទ៖ ​សារិត​