កូរ៉េខាងត្បូង ៖ ប្រព័ន្ធផ្សព្វផ្សាយប្រទេសកូរ៉េខាងត្បូង បានរាយការណ៍ថា ប្រទេសកូរ៉េខាងជើងធ្វើព្យុហយាត្រាយោធាប៉ារ៉ានៅទីក្រុងព្យុងយ៉ាងភាគកណ្តាល។ ថ្ងៃសៅរ៍នេះ គឺជាខួបលើកទី ៧៥ នៃការបង្កើតប្រទេសកូរ៉េខាងជើង។ ទីភ្នាក់ងារសារព័ត៌មានយ៉ុនហាប់ បានរាយការណ៍ថា សមាជិកនៃកងឆ្មាំក្រហមកម្មករ-កសិករ មិនមែនជាយោធាជាតិ បានចូលរួមនៅក្នុងក្បួនព្យុហយាត្រានៅទីលាន គីម អ៊ីលស៊ុង។ ទីភ្នាក់ងារនិយាយថា ក្បួនព្យុហយាត្រាហាក់ដូចជាមិនមានអាវុធយុទ្ធសាស្ត្រ ដូចជាមីស៊ីលបាលីស្ទីកអន្តរទ្វីបនោះទេ។ ក្រុមយោធាប៉ារ៉ា បានដង្ហែព្យុហយាត្រាចុងក្រោយក្នុងឆ្នាំ ២០២១ ។

សារព័ត៌មានក៏បានរាយការណ៍ផងដែរ គណៈប្រតិភូដែលដឹកនាំដោយឧបនាយករដ្ឋមន្ត្រីចិន លោក Liu Guozhong ដែលត្រូវបានគេជឿថាបានមកចូលរួមក្នុងការប្រារព្ធពិធី។ ប្រភពនានាបាននិយាយថា ក្រុមប្រតិភូរបស់រុស្ស៊ីក៏ត្រូវបានអញ្ជើញ។ ព្រឹត្តិការណ៍នេះត្រូវបានគេជឿថានឹងបង្ហាញពីសាមគ្គីភាពរបស់ប្រទេសទាំងបី ជាកម្លាំងប្រឆាំងសហរដ្ឋអាមេរិកនិងសម្ព័ន្ធមិត្ត។ 

នេះជាក្បួនព្យុហយាត្រាតាមបែបយោធាលើកទីបីនៅក្នុងប្រទេសកូរ៉េខាងជើងក្នុងឆ្នាំនេះ រួមទាំងព្យុហយាត្រាដែលរៀបចំដោយកងទ័ពជាតិ។ កាលពីខែកក្កដា មានក្បួនព្យុហយាត្រាធ្វើឡើងនៅកូរ៉េខាងជើង ដើម្បីប្រារព្ធខួបលើកទី ៧០ នៃបទឈប់បាញ់សង្គ្រាមកូរ៉េ។ មុនពេលព្រឹត្តិការណ៍នៅសៅរ៍នេះ ទូរទស្សន៍រដ្ឋបានចាក់ផ្សាយម្តងហើយម្តងទៀតអំពីនាវាមុជទឹកវាយប្រហារដោយនុយក្លេអ៊ែរយុទ្ធសាស្ត្រ ដែលមានការចូលរួមដោយលោក គីម ជុងអ៊ុន កាលពីថ្ងៃពុធ។ ទន្ទឹមនឹងនេះ លោក Kim តាមសេចក្តីរាយការណ៍ថានឹងធ្វើដំណើរទៅកាន់ប្រទេសរុស្ស៊ីជាលើកដំបូងក្នុងរយៈពេល ៤ ឆ្នាំមកនេះដើម្បីជួបជាមួយប្រធានាធិបតីលោក Vladimir Putin ដោយមានការព្រួយបារម្ភថា មេដឹកនាំទាំងពីរអាចនឹងពិភាក្សាគ្នាអំពីកិច្ចព្រមព្រៀងដែលនឹងផ្តល់ជំនួយដល់រុស្ស៊ីខាងជើងក្នុងការអភិវឌ្ឍន៍ផ្កាយរណប និងបច្ចេកវិទ្យានាវាមុជទឹកដើរដោយថាមពលនុយក្លេអ៊ែរ ជាថ្នូរនឹងគ្រឿងសព្វាវុធ។