ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា គោលដៅដ៏ធំរបស់រាជរដ្ឋាភិបាលកម្ពុជាក្នុងអាណត្តិទី៧នេះ គឺខិតខំធ្វើយ៉ាងណាកាត់បន្ថយភាពក្រីក្រ និងបង្កើនការងារជូនប្រជាពលរដ្ឋខ្មែរគ្រប់រូប ពោលគឺត្រូវបង្កើតការងារឲ្យបានដល់មូលដ្ឋានតែម្តង។

ថ្លែងនៅក្នុងឱកាសសំណេះសំណាលជាមួយកម្មករនិយោជិត ជិត២ម៉ឺននាក់ មកពីតាមរោងចក្រ សហគ្រាសចំនួន១៤ នៅស្រុកសំរោងទង ខេត្តកំពង់ស្ពឺ នាព្រឹកថ្ងៃទី៩ ខែកញ្ញា ឆ្នាំ២០២៣នេះ សម្តេចធិបតីនាយករដ្ឋមន្ត្រី បានបញ្ជាក់ថា រាជរដ្ឋាភិបាលគ្មានអ្វីក្រៅពីការប្តេជ្ញាចិត្ត ក្នុងការបម្រើដល់ប្រជាពលរដ្ឋឲ្យអស់ពីកម្លាំងកាយចិត្ត ខណៈគោលនយោបាយដែលបានអនុវត្តនាពេលកន្លងទៅរបស់រាជរដ្ឋាភិបាល គឺនៅតែបន្តអនុវត្តទៅមុខទៀតជាដរាប ដើម្បីគុណប្រយោជន៍របស់ប្រជាពលរដ្ឋនៅទូទាំងប្រទេស។

នៅក្នុងឱកាសសំណេះសំណាលជាមួយបងប្អូនកម្មករ និយោជិតនោះដែរ សម្តេចធិបតីនាយករដ្ឋមន្ត្រី ក៏បានប្រកាសផងដែរថា នឹងចុះជួបបងប្អូនអាជីវករនៅតាមបណ្តាផ្សារនានា និងប្រជាពលរដ្ឋប្រកបរបរក្រៅប្រព័ន្ធ ដើម្បីស្តាប់ពីកង្វល់ និងយកមកដោះស្រាយឱ្យបានទាន់ពេលវេលា។ មួយវិញទៀត រាជរដ្ឋាភិបាលមានបេសកម្មជំរុញការដោះស្រាយបញ្ហាទាំងក្នុងប្រព័ន្ធ និងក្រៅប្រព័ន្ធផងដែរ៕ អត្ថបទ ៖ បាន ចក់