ដើម្បីជួយសង្រ្គោះជីវិតមនុស្ស ក្នុងគ្រាមានឧប្បទ្ទវហេតុ នៅប្រការណាមួយ ដែល​កើត​ឡើង​នៅ​កណ្តាល​ផ្លូវ​ ឬទីតាំងណាមួយ ដែលជួបក្នុងការជួយសង្រ្គោះបឋមនោះ ក្នុង​ឱកាស​ទិវា​ពិភព​លោក​វិជ្ជា​សង្រ្គោះ​បឋម​ឆ្នាំនេះ កាកបាទក្រហមកម្ពុជា បានរៀបចំធ្វើឡើងក្រោមប្រធានបទ «វិជ្ជា​សង្គ្រោះ​បឋម​ក្នុង​សម័យឌីជីថល» នាផ្សារទំនើប អ៊ីអនម៉ល៣ ក្រោមវត្តមានលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងលោកគ្រូ អ្នកគ្រូឯកទេសផ្នែក វិជ្ជាសង្គ្រោះបឋម សមាជិក សមាជិកា អ្នកស្ម័គ្រចិត្ត យុវជន កាកបាទក្រហមកម្ពុជាជាច្រើនរូបទៀត។

ថ្លែង​ក្នុង​ឱកាសបិទ​កម្មវិធីលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា មាន​ប្រសាសន៍​ថា វិជ្ជាសង្គ្រោះបឋម គឺជាមុខវិជ្ជាដ៏មានសារៈសំខាន់មួយ ដែល​យើង​ទាំង​អស់​គ្នា​ត្រូវ​សិក្សា ​ដើម្បីទុកជាមូលដ្ឋានគ្រឹះសម្រាប់សង្គ្រោះក្រុមគ្រួសារ បងប្អូនប្រជាពលរដ្ឋ នៅ​ក្នុង​សហគមន៍​ ដែល​រងគ្រោះថ្នាក់ផ្សេងៗដោយចៃដន្យមានដូចជា៖ ខ្យល់គរ ស្ទះដង្ហើម បាក់ឆ្អឹង និ​ង​គ្រោះថ្នាក់​ចរាចរណ៍ជាដើម មុនពេលគ្រូពេទ្យមកដល់ ឬបញ្ជូនអ្នករងគ្រោះទៅកាន់មន្ទីរពេទ្យ។

លោកជំទាវបន្តថា ការប្រារព្ធទិវាពិភពលោកសង្រ្គោះបឋមនេះ ក្នុងគោលបំណង​ដើម្បី​ទទួល​បាន​នូវ​ចំណេះ​ដឹង និងការគាំទ្រ ការថែទាំពីអ្នកសង្គ្រោះបឋម ឱ្យកាន់​តែ​ប្រសើរ​ឡើង​សម្រាប់​ជន​គ្រប់​រូប​ ដើម្បីប្រមូលការយកចិត្តទុកដាក់ លើកកម្ពស់ជីវិតរស់នៅ ធានាបានថាការសង្គ្រោះបឋម គឺជា​ធនធាន​មួយ​ចូលរួមពង្រីកនូវចំណេះដឹង ឱ្យបានទូលំទូលាយ លើកកម្ពស់សុខភាពប្រជាពលរដ្ឋ ឈាន​ទៅ​សម្រេច​បាន​ស្រប​តាមយុទ្ធសាស្ត្រ កាកបាទក្រហមកម្ពុជា ឆ្នាំ២០២១ - ២០៣០ គ្រួសារ​មួយ​មាន​មនុស្សម្នាក់ ស្ថាប័នសាធារណៈ ឬវិស័យឯកជន យល់ដឹងពីវិជ្ជាសង្រ្គោះបឋម។

លោកជំទាវសង្ឃឹមយ៉ាងមុតមាំថា វិសាលភាពនៃ វិជ្ជាសង្គ្រោះបឋមក្នុងសម័យឌីជីថល និង​ឆ្ពោះ​ទៅ​គោល​ដៅ​អភិវឌ្ឍន៍ តាមយុទ្ធសាស្ត្រ របស់រាជរដ្ឋាភិបាលកម្ពុជា ក្នុង​បរិបទ​បរិយាប័ន្ន​សង្គម​រួម​គ្នា​ជា​ធ្លុង​មួយ ដែលជាសកម្មភាពគំរូ ក្នុងការបំរើការងារមនុស្សធម៌ ប្រកប​ដោយ​សណ្តាន​ចិត្ត​ល្អ​ប្រពៃ​ មានក្រមសិលធម៌ខ្ពស់ ជូនដល់សង្គមជាតិយើង ឱ្យមានការរីកចំរើន ក្រោម​ម្លប់​នៃ​សន្តិភាព​។

ឆ្លៀត​ក្នុងឱកាសនោះដែរលោកជំទាវ បានធ្វើការផ្ដាំផ្ញើដល់អ្នកស្ម័គ្រចិត្ដ និងយុវជនទាំងអស់ ជា​ពិសេស​យុវជ​នកាកបាទក្រហមកម្ពុជា ដែលមានវត្ដមាននៅទីនេះ ក្រោយពី​ទទួល​បាន​នូវ​វគ្គ​បណ្ដុះ​បណ្ដាល ស្ដីពីវិជ្ជាសង្គ្រោះបឋម និងចូលរួមសកម្មភាពនៅក្នុងគម្រោង របស់​កាក​បាទ​ក្រហម​កម្ពុជា​រួចហើយ សូមក្មួយៗយកចំណេះដឹងនេះ ទៅប្រើប្រាស់ឲ្យបានត្រឹមត្រូវ និង​ធ្វើ​ការ​ផ្សព្វ​ផ្សាយ​បន្ដ ឲ្យបានទូលំទូលាយដល់សហគមន៍ប្រជាពលរដ្ឋ និង​មិត្ដ​ភក្ដិ​នូវ​វិជា្ជ​សង្គ្រោះ​បឋម​នេះ​៕ អត្ថបទៈ សំ ងីម