មន្ទីរព្យុះសង្ឃរាជាតិសហរដ្ឋអាមេរិក បាននិយាយថា ព្យុះសង្ឃរា Lee ដែលជាព្យុះកម្រិតទី ៣​មាន​កម្លាំង​ដ៏ខ្លាំងក្លា បានធ្វើដំណើរឆ្ពោះទៅកាន់តំបន់ភាគខាងជើងដែនដីព័រតូ រីកូ និងប្រជុំកោះ Virgin របស់សហរដ្ឋអាមេរិក ប៉ុន្តែវា​អាច​បង្ក​ឲ្យ​កើត​មាន​ស្ថានភាព​ដ៏​គ្រោះថ្នា​ក់​នៅ​តាម​តំបន់​ឆ្នេរ​ភាគ​ខាង​កើត​សហរដ្ឋអាមេរិក ចាប់ពីថ្ងៃអាទិត្យនេះតទៅ ។

ព្យុះ Lee ដែលស្ថិតនៅចម្ងាយប្រហែលជាង ៥៦០គ.មភាគខាងឦសានកោះភាគខាងជើង Leeward បានបោកបក់ក្នុងកម្លាំងខ្យល់បក់ ១៨៥គ.មក្នុង ១ម៉ោង ហើយ​វាកំពុង​ធ្វើ​ដំណើរ​យឺតៗ​ក្នុង​ល្បឿន ១៩គ.ម ក្នុង១ម៉ោង ឆ្ពោះទៅទិសពាយព្យ ប៉ុន្តែល្បឿនរបស់វា ត្រូវបាន​គេ​ព្យាករណ៍​ថា នឹងថមថយវិញ បើទោះបីជាវានៅតែជាព្យុះដ៏គ្រោះថ្នាក់ក៏ដោយ ។

ក្រុមអ្នកព្យាករណ៍ឧតុនិយម និយាយថា វាឆាប់​រហ័ស​ពេក​ហើយ​ក្នុង​ការ​ព្យាករណ៍​ពី​ទំហំ​នៃ​ផល​ប៉ះពាល់​បង្កឡើងដោយសារព្យុះមួយនេះ ពេលដែលព្យុះ Lee បោកបក់​ឆ្លង​កាត់​តំបន់​ឆ្នេរ​ភាគ​ខាង​កើត​សហរដ្ឋអាមេរិក ខេត្ត Atlantic Canada របស់កាណាដា ឬដែនដី Bermuda របស់​អង់គ្លេស ជាពិសេសនៅពេលដែលវាបោកបក់ឆ្លងកាត់តំបន់ភាគនិរតីសមុទ្រអាត្លង់ទិក ។

សូម​បញ្ជាក់ថា ព្យុះ Lee បានបង្កើនកម្លាំងរបស់វាជាព្យុះកម្រិតទី ៥នៅដើមសប្តាហ៍នេះ មុន​ពេល​វា​ថម​ថយកម្លាំងមកនៅជាព្យុះកម្រិតទី ៣វិញ ៕