កាលពីថ្ងៃសៅរ៍ម្សិលមិញ រដ្ឋមន្រ្តីការបរទេសជប៉ុន លោក Yoshimasa Hayashi បាន​បំពេញ​ទស្សន​​កិច្ចទៅកាន់ទីក្រុងគីវ ជាកន្លែងដែលលោកបានជួបជាមួយក្រុមមន្រ្តីជាន់ខ្ពស់អ៊ុយក្រែន រួម​ទាំង​លោក​ប្រធានាធិបតី Volodymyr Zelenskiy ។

 ក្រសួងការបរទសជប៉ុន និយាយថា លោក Yoshimasa និងលោក Zelenskiy បានស្វាគមន៍គ្នា ពេល​ចាប់ផ្តើមកិច្ចពិភាក្សាលើការធានាសន្តិសុខ និង​កិច្ច​សហប្រតិបត្តិការ​ជុំវិញ​កា​រស្តា​សេដ្ឋកិច្ច​អ៊ុយក្រែន​ឡើង​វិញ ។ 

 លោក Yoshimasa បានសន្យាចំពោះការគាំទ្រពីវិស័យរដ្ឋ និងឯកជននៅក្នុងប្រទេសជប៉ុន ដើម្បី​កសាងសេដ្ឋកិច្ចអ៊ុយក្រែនឡើងវិញ អំឡុង​ដំណើរ​ទស្សន​កិច្ច​ដ៏​គួរ​ភ្ញាក់​ផ្អើល​របស់​លោក​ទៅ​កាន់​ទីក្រុងគីវ ជាទីដែលលោកមានការរួមដំណើរពីប្រធានប្រតិបត្តិក្រុមហ៊ុនជប៉ុនជាច្រើនរូប រួម​ទាំង​លោក Hiroshi Mikitani ដែលជាស្ថាបនិក និងជាប្រធានប្រតិបត្តិក្រុមហ៊ុន Rakuten Group ​។

 អំឡុងជំនួបជាមួយរដ្ឋមន្រ្តីការបរទេសអ៊ុយក្រែន លោក Yoshimasa បានផ្ទេរ​រថយន្ត​ពិសេស​ជា​ច្រើន​គ្រឿង​ និងឧបករណ៍ដោះមីនដល់ក្រុមជួយសង្រ្គោះអ៊ុយក្រែន ៕