ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (១០ ខែកញ្ញា) នេះថា មេដឹកនាំកូរ៉េខាងជើង លោក គីម ជុងអ៊ុន បានចូលរួមកម្មពិធីថតរូបជាមួយអ្នកចូលរួមប្រារព្ធខួបលើកទី៧៥ នៃ​ការ​បង្កើត​ប្រ​ទេស ប៉ុន្តែមិនបានចូលរួមក្នុងព្រឹត្តិការណ៍ផ្សេងៗទៀតទេ ស្រប​ពេល​មាន​សេចក្តី​រាយ​ការណ៍​ថា លោកនឹងចាកចេញទៅប្រទេសរុស្សីក្នុងពេលឆាប់ៗនេះ។

ប្រព័ន្ធផ្សព្វផ្សាយ KCNA មិនបានលើកឡើងអំពីដំណើរទស្សនកិច្ចលោក គីម ទៅប្រទេសរុស្ស៊ី ក្រៅ​ពីការចូលរួមក្នុងកម្មវិធីថតរូបនៅទីលាននៃទីធ្លាបូជាសពឪពុក និងជីតារបស់លោកទេ ខណៈ​លោក គីម បានសរសើរប្រជាជនថា «ដាក់កិច្ចការរដ្ឋជាអាទិភាព លើសកិច្ចការគ្រួសារ ទោះ​បី​ជា​ស្ថិត​ក្នុង​ថ្ងៃល្អ ឬអាក្រក់ក៏ដោយ»។

លោក គីម ត្រូវបានគេរំពឹងថានឹងធ្វើដំណើរទៅកាន់ទីក្រុង Vladivostok នៅចុងបូព៌ារបស់រុស្ស៊ី ដើម្បី​ជួប​ជាមួយលោកប្រធានាធិបតី វ្លាឌីមៀ ពូទីន ដើម្បីពិភាក្សាអំពីការផ្គត់ផ្គង់អាវុធ និង​កិច្ច​សហប្រតិបត្តិការ​យោធាផ្សេងទៀត ដែលទំនងជានៅខាងក្រៅវេទិកាសេដ្ឋកិច្ចបូព៌ា ដែល​គ្រោង​នឹង​ចាប់​ផ្តើមនៅថ្ងៃអាទិត្យនេះផងដែរ៕