ព្រះសីហនុ៖ នាព្រឹកថ្ងៃទី១១ ខែកញ្ញា ឆ្នាំ២០២៣នេះឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា រួមដំណើរជាមួយ ឯកឧត្តម ជា វុទ្ធី អគ្គលេខាធិការ​គណៈកម្មាធិការវិនិយោគកម្ពុជា ​ប្រតិភូអមដំណើរ និងឯកឧត្តមអភិបាលនៃគណៈអភិបាល​ខេត្តព្រះសីហនុ ព្រមទាំងតំណាងអាជ្ញាធរដែនដី បានអញ្ជើញបំពេញទស្សនកិច្ចពិនិត្យវឌ្ឍនភាព​នៃការអភិវឌ្ឍតំបន់សេដ្ឋកិច្ចពិសេសនៅខេត្តព្រះសីហនុ ។

ជាមួយគ្នានោះឯកឧត្តមឧបនាយករដ្ឋមន្ត្រី និងប្រតិភូអមដំណើរក៏បានពិនិត្យមើលសកម្មភាព​ផលិតកម្ម​របស់​ក្រុមហ៊ុនមួយចំនួននៅក្នុងតំបន់សេដ្ឋកិច្ចពិសេសផងដែរ។

មន្ត្រីបានឱ្យដឹងថា តំបន់សេដ្ឋកិច្ចពិសេសកំពង់ផែក្រុងព្រះសីហនុ ចាប់ផ្តើមដំណើរការពីថ្ងៃទី០២ ខែកញ្ញា ឆ្នាំ២០០៩ ​មានទីតាំងស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ​ខេត្តព្រះសីហនុ លើផ្ទៃដីទំហំ ៦៧៤.៩៣៧ ម៉ែត្រក្រឡា។ តំបន់សេដ្ឋកិច្ចពិសេសកំពង់ផែក្រុងព្រះសីហនុ មាន​គម្រោងវិនិយោគចំនួន ០៥គម្រោង ដែលវិនិយោគដូចជា ផលិតគ្រឿងសម្ភារៈថែរក្សាសម្ភស្ស កេសកាតុង ព្យ៉ាណូកែច្នៃ ឧបករណ៍សត្វចិញ្ចឹម គម្របប្លាស្ទិក និងដែកថែបគ្រប់ប្រភេទ។ តំបន់សេដ្ឋកិច្ចពិសេសកំពង់ផែក្រុងព្រះសីហនុ បានផ្តល់ការងារជូនដល់កម្មករនិយោជិត​ប្រមាណជាង ២០០ នាក់។

មន្ត្រីបន្ថែមថា សម្រាប់តំបន់សេដ្ឋកិច្ចពិសេសក្រុងព្រះសីហនុ ​គឺចាប់ផ្តើមដំណើរការពីថ្ងៃទី១៧ ខែមីនា ឆ្នាំ២០០៨​ មានទីតាំងស្ថិតក្នុងភូមិពូធឿង ឃុំបិតត្រាង ​និងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ លើផ្ទៃដីទំហំ ១.១១៣ ហិកតា។

បច្ចុប្បន្ននៅក្នុងតំបន់សេដ្ឋកិច្ចពិសេសក្រុងព្រះសីហនុ ​មានគម្រោងវិនិយោគចំនួន ​២៣១គម្រោង ដែល​វិនិយោគមដូចជា ផលិតសម្ភារៈអេឡិចត្រូនិក ខ្សែបង្គុំអគ្គិសនី គ្រឿង​បន្លាស់រថយន្ត ស៊ុមទូរទស្សន៍ បន្ទះសូឡា គ្រឿងចក្រលើកដាក់ទំនិញ ​ដែកទីប បរិក្ខារពេទ្យ ​ក្តារប៉ាកេ ក្តារបន្ទះ គ្រឿង​សង្ហារឹម​ សម្ភារៈបរិក្ខារសម្រាប់កីឡាប្រណាំងសេះ ចំណីសត្វ ​សម្ភារៈការិយាល័យ វត្ថុអនុស្សាវរីយ៍ ​សម្ភារៈការពាររាងកាយ សម្ភារៈបរិក្ខារកីឡា ​សម្ភារៈប្រើប្រាស់ក្នុងផ្ទះ ស្រោមពូក សម្ភារៈការពារអគ្គីភ័យ ​សំលៀកបំពាក់ ស្បែកជើង កាបូបនិងវ៉ាលី និងសំបកវេចខ្ចប់ សំបកកង់រថយន្ត កាវ និងទឹកថ្នាំ។ តំបន់សេដ្ឋកិច្ចពិសេសក្រុងព្រះសីហនុ បានផ្តល់​ការងារជូនដល់កម្មករនិយោជិតប្រមាណជា​ ២៥.៦០០ នាក់។

នៅក្នុងដំណើរបំពេញទស្សនកិច្ចនេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានថ្លៃងអំណរ​គុណដល់ថ្នាក់ដឹកនាំអ្នកអភិវឌ្ឍន៍តំបន់សេដ្ឋកិច្ចពិសេស ​និងក្រុមហ៊ុន ដែលបានមកបណ្តាក់ទុន​វិនិយោគនៅព្រះរាជាណាចក្រកម្ពុជាកន្លងមក ​ទោះស្ថិតក្នុងកាលៈទេសៈដ៏លំបាក​នៃការរីករាល​ដាលនៃជំងឺកូវីដ១៩ក្តី ក៏ក្រុមហ៊ុននៅតែបន្តចង្វាក់ផលិតកម្មរបស់ខ្លួនរហូតមកដល់បច្ចុប្បន្ន ដែល​នេះជាការបង្ហាញពីជំនឿទុកចិត្តរបស់ក្រុមហ៊ុនមកលើរាជរដ្ឋាភិបាល ក្នុងការថែរក្សាសុខសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច។

ឯកឧត្តមឧបនាយករដ្ឋមន្ត្រី ​ក៏បានបន្ថែមទៀតថា ក្រុមហ៊ុនទាំងអស់ដែលមកបណ្តាក់ទុន​នៅក្នុង​ព្រះរាជាណាចក្រកម្ពុជា គឺជាការចូលរួមចំណែកដ៏សំខាន់ដល់ការធ្វើពិពិធកម្មសេដ្ឋកិច្ចកម្ពុជា។ ឯកឧត្តម ឧបនាយករដ្ឋមន្ត្រី បានវាយតម្លៃខ្ពស់ចំពោះថ្នាក់ដឹកនាំ​អ្នក​អភិវឌ្ឍន៍តំបន់ ក៏ដូចជា​ថ្នាក់ដឹកនាំក្រុមហ៊ុនទាំងអស់ ​ដែលបានខិតខំ​ប្រឹងប្រែង​កន្លងមក និងទទួលបានលទ្ធផល​ផ្លែផ្កាគួរជាទីមោទនៈ៕អត្ថបទ ៖ ប្រាក់ វ៉ាន់ដា