កីឡាការិនីវាយកូនបាល់វ័យក្មេងអាមេរិក Coco Gauff បាន​សំរេច​ក្តី​ស្រមៃ​របស់​ខ្លួន​ក្នុង​ការ​ប៉ុន​ប៉ង​ចង់​ឈ្នះ Grand Slam លើកដំបូងក្នុងអាជីព បន្ទាប់ពីវាយបកយកឈ្នះកីឡាការិនី Aryna Sabalenka នៅវគ្គផ្តាច់ព្រ័ត្រលើកពាន US Open។

នៅចំពោះមុខអ្នកគាំទ្ររបស់ខ្លួន ក្នុងទឹកដីរបស់ខ្លួន Coco Gauff ចាប់​ផ្តើម​មិន​បាន​ល្អ​ឡើយ​ក្រោយ​ជើង​ឯក Australian Open កីឡាការិនីបេឡារុស Aryna Sabalenka យកឈ្នះ​សិត​ដំបូង​ ៦-២។

យ៉ាងណាក្តី កីឡាការិនីអាមេរិកដែលមានវ័យទើបតែ ១៩ ឆ្នាំ Coco Gauff បាន​កែប្រែ​ស្ថានការ​ដោយ​យក​ឈ្នះនៅសិតទីពីរ ៦-៣ ហើយក៏មានទំនុកចិត្តយកឈ្នះសិតកាត់សេចក្តី ៦-២។

ជ័យជំនះ Grand Slam លើកដំបូងរបស់ Coco Gauff នឹង​ធ្វើ​ឱ្យ​នាង​ឡើង​ឈរ​ចំណាត់​ថ្នាក់​ពិភព​លោក​លេខ៣ ដែលជាចំណាត់ថ្នាក់ល្អបំផុតក្នុងអាជីព។

ចំណែកកីឡាការិនីវ័យ ២៥ ឆ្នាំបេឡារុស Aryna Sabalenka ត្រូវ​រង់ចាំ​បន្ត​ទៀត​ក្នុង​ការ​ប៉ុន​ប៉ង​ចង់​ឈ្នះ​ពាន Grand Slam លើកទី ២ ក្នុងអាជីព តែយ៉ាង​ហោចណាស់​ក៏​ត្រូវ​បាន​លើក​ទឹក​ចិត្ត​មក​វិញ​ ដោយនាងនឹងក្លាយជាកីឡាការិនីលំដាប់លេខ ១ ពិភពលោកនៅថ្ងៃចន្ទនេះ៕ អត្ថបទ៖នាង សុភាវុធ