អ៊ុយក្រែន ៖ លោក Kyrylo Budanov គឺជាប្រធានក្រុមចារកម្មអ៊ុយក្រែន និយាយថា ការវាយបករបស់ទាហានរបស់លោកលើកងកម្លាំងរុស្ស៊ី នឹងបន្តពេញរដូវត្រជាក់ និងសើមនៅពេលបន្តិចទៀតក្នុងឆ្នាំនេះ បើទោះបីជាវាកាន់តែពិបាកក្នុងការវាយប្រហារក៏ដោយ ។ 

អ៊ុយក្រែន បានបើកការវាយបករបស់ខ្លួនក្នុងរដូវក្តៅ ដែលធ្វើឲ្យពួកគេដណ្តើមបានភូមិជាច្រើនមកវិញនៅតំបន់ភាគខាងត្បូង និងតំបន់ភាគខាងលិច ក្នុងរយៈពេលជាង ៣ខែកន្លងមកនេះ ប៉ុន្តែការវាយបករបស់ពួកគេ មានលក្ខណៈស្មុគស្មាញខ្លាំងដោយសារតែចម្ការមីន និងលេណដ្ឋានដ៏រឹងមាំរបស់ទាហានរុស្ស៊ី ។ 

លោក Budanov និយាយថា សកម្មភាពប្រយុទ្ធនៅតែបន្តតាមវិធីមួយ ឬវិធីមួយទៀត ។ ក្នុងស្ថានភាពអាកាសធាតុត្រជាក់ សើម និងមានភក់ វាកាន់តែពិបាកប្រយុទ្ធ ប៉ុន្តែការវាយបកគឺនៅតែបន្ត ។  

សេចក្តីអធិប្បាយបែបនេះ បានធ្វើឡើងនៅក្នុងទីក្រុងគីវ ដែលរៀបចំឡើងដោយមូលនិធិ Victor Pinchuk ជាការផ្តល់ព័ត៌មានចុងក្រោយថា អ៊ុយក្រែនគ្មានផែនការបញ្ឈប់ការរុលទៅមុខរបស់ពួកគេឡើយ បើទោះបីជាអាកាសធាតុប្រែប្រួលទៅជាត្រជាក់នៅពេលក្រោយក្នុងឆ្នាំនេះក៏ដោយ ។ 

ខណៈពេលនោះដែរ លោកខាងលិច បានផ្គត់ផ្គង់ថវិការាប់ពាន់លានដុល្លារសម្រាប់គ្រឿងយុទ្ធោបករណ៍ និងបង្វឹកទាហានអ៊ុយក្រែនរាប់ពាន់នាក់ សម្រាប់ការវាយបក ដើម្បីជួយទីក្រុងគីវ ដណ្តើមទឹកដីរបស់ពួកគេមកវិញ ។ 

ប៉ុន្តែការវាយបករុលទៅមុខយឺតយ៉ាវ បានធ្វើឲ្យមានក្តីកង្វល់នៅក្នុងចំណោមក្រុមអ្នកគាំទ្រទីក្រុងគីវថា លោកខាងលិចអាចនឹងពិបាករក្សាទំហំជំនួយយោធារបស់ពួកគេ ដើម្បីឲ្យអ៊ុយក្រែនបន្តធ្វើសង្រ្គាមនៅក្នុងសន្ទុះកម្លាំងតែមួយ ។ 

ដោយឡែក លោក Vadym Skibytskyi គឺជាមន្រ្តីមកពីទីភ្នាក់ងារចារកម្មយោធាអ៊ុយក្រែន និយាយកាលពីព្រឹកថ្ងៃសៅរ៍ចុងសប្តាហ៍មុនថា បច្ចុប្បន្នរុស្ស៊ីមានកម្លាំងទ័ពប្រហែល ៤២ម៉ឺននាក់នៅក្នុងទឹកដីអ៊ុយក្រែន ៕