ម៉ារ៉ុក ៖ អ្នកស្រុកជាច្រើននៃទីក្រុង Marrakesh របស់ៀប្រទេសម៉ារ៉ុក បានសម្តែងការភ័យខ្លាច និងតក់ស្លុត ខណៈដែលគ្រោះរញ្ជួយដីកាលពីថ្ងៃសុក្រ បានវាយប្រហារបំផ្លាញអគារ ផ្ទះសម្បែង និងទ្រព្យសម្បត្តិជាច្រើនទៀត ដោយបានឆក់យកជីវិតមនុស្សជាង២.១០០នាក់ ជាមួយនឹងចំនួនអ្នកស្លាប់ដែលរំពឹងថានឹងកើនឡើងបន្ថែមទៀត ខណៈដែលក្រុមអ្នកជួយសង្គ្រោះកំពុងជួបផលលំបាកក្នុងការរុករកទៅដល់តំបន់ដាច់ស្រយាលដែលរងគ្រោះខ្លាំង។

អ្នកស្រុកខ្លះបាននិយាយថា ពួកគេកំពុងសម្រាន្តនៅក្នុងផ្ទះរបស់ខ្លួនក្នុងទីក្រុង Marrakesh ប្រទេសម៉ារ៉ុក នៅពេលដែលការរញ្ជួយដីកម្រិត៦,៨វ៉ិចទ័រ បានវាយប្រហារ។ ពួកគេមិនអាចរត់គេចបានលឿននោះទេ ហើយមនុស្សច្រើននាក់បានជាប់គាំងក្នុងបំណែកបែកបាក់ ខណៈដំបូលផ្ទះបានដួលរលំកាលពីយប់ថ្ងៃសុក្រ។ ជាសំណាងល្អ អ្នកជិតខាងរបស់ពួកគេបានមកជួយសង្គ្រោះ ហើយទាញចេញពីគំនរបែកបាក់នោះ។

មនុស្សជាង២.១២២នាក់ ត្រូវបានស្លាប់ និងមនុស្សយ៉ាងហោចណាស់២.៤២១នាក់ បានរងរបួសដោយការរញ្ជួយដីនេះ ហើយវាក៏បានបំផ្លាញអគារប្រវត្តិសាស្ត្រនៅទីក្រុង Marrakesh ដែលជាទីក្រុងធំបំផុតទី៤ ក្នុងប្រទេសម៉ារ៉ុក ចម្ងាយប្រហែល៧០គីឡូម៉ែត្រ ពីចំណុចកណ្តាលនៃគ្រោះរញ្ជួយដីនេះផងដែរ។

អ្នកស្រុកនៅតំបន់ដែលរងផលប៉ះពាល់ជាច្រើន ត្រូវបានគ្មានផ្ទះសម្បែង ដោយសារការបំផ្លិចបំផ្លាញ ខណៈមនុស្សជាច្រើនបានសម្រាន្តនៅទីវាលកាលពីយប់ថ្ងៃសៅរ៍ និងថ្ងៃអាទិត្យ ដោយភ័យខ្លាចថាអាចនៅមានហេតុការណ៍គ្រោះថ្នាក់ទៀត ហើយក៏ខ្លាចថាដំបូល និងជញ្ជាំងផ្ទះបាក់សង្កត់ផងដែរ៕