វៀតណាម ៖ មនុស្សដែលនៅស្និតនឹងកិច្ចប្រជុំនេះ បាននិយាយប្រាប់ទីភ្នាក់ងារព័ត៌មានរ៉យទ័រកាលពីថ្ងៃអាទិត្យថា ក្រុមហ៊ុនអាកាសចរណ៍វៀតណាម ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងដំបូង ដើម្បីទិញយន្តហោះ Boeing 737 Max ប្រហែល ៥០គ្រឿង នៅក្នុងកិច្ចព្រមព្រៀងមួយតម្លៃប្រហែល ៧,៥ពាន់លានដុល្លារ ស្របពេលដែលប្រធានាធិបតីសហរដ្ឋអាមេរិកលោក Joe Biden បំពេញទស្សនកិច្ចមកកាន់ទីក្រុងហាណូយ ដើម្បីពង្រឹងទំនាក់ទំនងជាមួយអតីតប្រទេសសត្រូវមួយនេះ ។ 

 ក្រុមហ៊ុន Boeing និងក្រុមហ៊ុនអាកាសចរណ៍វៀតណាម ពុំបានឆ្លើយតបភ្លាមៗនោះទេនឹងសំណើរសុំសេចក្តីអធិប្បាយ ។ 

 កិច្ចព្រមព្រៀងនេះ នឹងមានតម្លៃ ៧ពាន់លានដុល្លារនៅក្នុងបញ្ជីតម្លៃ ហើយតាមធម្មតាក្រុមហ៊ុនដែលទិញដុំបែបនេះ នឹងទទួលបានការបញ្ចុះតម្លៃ ប៉ុន្តែមនុស្សដែលស្និតជាមួយនឹងកិច្ចប្រជុំនេះ ពុំបានផ្តល់សេចក្តីអធិប្បាយលើតម្លៃនោះឡើយ ។  

 ក្រុមហ៊ុន Boeing មានកិច្ចព្រមព្រៀងផងដែរជាមួយក្រុមហ៊ុន VietJet ដែលគូប្រជែងរបស់ក្រុមហ៊ុនអាកាសចរណ៍វៀតណាម សម្រាប់ការលក់យន្តហោះ 737 MAX ចំនួន ២០០គ្រឿងរបស់ពួកគេ ។ 

 យោងតាមការអះអាងរបស់សមាគមដឹកជញ្ជូនអាកាសចរណ៍អន្តរជាតិ (IATA) បានឲ្យដឹងថា វៀតណាម គឺជាទីផ្សារអាកាសចរណ៍រីកចម្រើលឿនជាងគេបំផុតលំដាប់ទី ៥របស់ពិភពលោក កាលពីឆ្នាំ ២០២២ ពេលដែលពួកគេដកចេញវិធានការរឹតត្បិតការធ្វើដំណើរជំងឺ COVID-19 ដោយពួកគេបានព្យាករណ៍ថា ប្រទេសមួយនេះ នឹងមានអ្នកដំណើរតាមផ្លូវអាកាស ១៥០លាននាក់នៅឆ្នាំ ២០៣៥ខាងមុខ ៕