អាហ្វាគីស្ថាន ៖ របាយការណ៍ពីទីភ្នាក់ងារគ្រឿងញៀនរបស់អង្គការសហប្រជាជាតិ បានឲ្យដឹងកាលពីថ្ងៃអាទិត្យថា អាហ្វហ្គានីស្ថាន គឺជាប្រទេសផលិតមេតំហ្វេតាមីនដែលកំពុងរីកចម្រើនលឿនបំផុតនៅក្នុងពិភពលោក។ ប្រទេសនេះ ក៏ជាប្រទេសផលិតអាភៀន និងជាប្រភពហេរ៉ូអ៊ីនដ៏សំខាន់ផងដែរ បើទោះបីជាពួកតាលីបង់ បានប្រកាសសង្គ្រាមប្រឆាំងគ្រឿងញៀន បន្ទាប់ពីពួកគេ បានវិលចូលមកកាន់អំណាច ក្នុងខែសីហា ឆ្នាំ ២០២១ ក្តី។

ការិយាល័យទទួលបន្ទុកបញ្ហាគ្រឿងញៀន និងឧក្រិដ្ឋកម្មរបស់អង្គការសហប្រជាជាតិ ដែលបានបោះពុម្ភ របាយការណ៍នេះ បាននិយាយថា មេតំហ្វេតាមីននៅក្នុងប្រទេសអាហ្វហ្គានីស្ថានភាគច្រើន ត្រូវបានផលិតចេញពីសារធាតុដែលមានស្របច្បាប់ ឬ ចម្រាញ់ចេញពីរុក្ខជាតិអេហ្វេដ្រា ( ephedra) ដែលដុះនៅក្នុងព្រៃភ្នំ។

របាយការណ៍នោះ បានហៅការផលិតថ្នាំញៀនរបស់អាហ្វហ្គានីស្ថានថា ជាការគំរាមកំហែងកាន់តែខ្លាំងឡើងចំពោះសុខភាព និងសន្តិសុខជាតិនិងតំបន់ ព្រោះវាអាចរំខានដល់ទីផ្សារថ្នាំសំយោគ និងថ្នាំជួយកម្លាំង។ វាបាននិយាយថា ការរឹបអូសថ្នាំញៀនដែលសង្ស័យថា បានមកពីប្រទេសអាហ្វហ្គានីស្ថាន ត្រូវបានរាយការណ៍ពីសហភាពអឺរ៉ុប និងអាហ្វ្រិកខាងកើត។

របាយការណ៍ដដែល បាននិយាយថា ការរឹបអូសគ្រឿងញៀនប្រចាំឆ្នាំសរុបពីក្នុងប្រទេស បានកើនឡើងពីតិចជាង ១០០ គីឡូក្រាម (២២០ ផោន) ក្នុងឆ្នាំ ២០១៩ ដល់ជិត ២.៧០០គីឡូក្រាម (៦.០០០ ផោន) ក្នុងឆ្នាំ២០២១ ដែលបង្ហាញពីការកើនឡើងនៃផលិតកម្ម។ ប៉ុន្តែវាពុំអាចផ្តល់តម្លៃសម្រាប់ការផ្គត់ផ្គង់មេតាំហ្វេតាមីនរបស់ប្រទេសនេះទាំងបរិមាណដែលកំពុងផលិត និងការប្រើប្រាស់ក្នុងស្រុក ដោយសារមិនមានទិន្នន័យ។