ទោះបីជាទទួលរងការបរិហារយ៉ាងទូលំទូលាយក៏ដោយ ក៏ប្រទេសរុស្ស៊ី កាលពីថ្ងៃអាទិត្យ (ទី១០ ខែកញ្ញា) បានបញ្ចប់ការបោះឆ្នោតថ្នាក់តំបន់ និងក្រុង ដោយក្នុងនោះរួមទាំងតំបន់ ដែលត្រូវបានបញ្ចូលជាឧបសម្ព័ន្ធពីអ៊ុយក្រែនផងដែរ ខណៈលទ្ធផល បានផ្តល់ការគាំទ្រយ៉ាងរឹងមាំដល់ប្រធានាធិបតី លោក វ្ល៉ាឌីមៀរ ពូទីន ចំពេលមានការរិះគន់អំពីការលួចបន្លំសំឡេងឆ្នោត និងការជំរុញរបស់ទីក្រុងគីវ ដើម្បីទាមទារដែនដីរបស់ខ្លួនមកវិញ។

ក្រុមប្រឹក្សាអឺរ៉ុប ដែលជាក្រុមសិទ្ធិមនុស្សឈានមុខគេរបស់អឺរ៉ុប បានហៅការបោះឆ្នោតរយៈពេលមួយសប្តាហ៍នេះថា ជាការរំលោភច្បាប់អន្តរជាតិ ហើយទីក្រុងគីវ និងសម្ព័ន្ធមិត្ត បាននិយាយថា នោះគឺជាការប៉ុនប៉ងខុសច្បាប់ ដើម្បីពង្រឹងការកាន់កាប់របស់ទីក្រុងម៉ូស្គូលើតំបន់នានា នៅភាគខាងត្បូង និងខាងកើតរបស់អ៊ុយក្រែន។

ការបោះឆ្នោតដ៏ច្រើនលើសលប់ នៅទូទាំងប្រទេសរុស្ស៊ី និងក្នុងតំបន់ ដែលត្រូវបានបញ្ចូលជាឧបសម្ព័ន្ធ សម្រាប់ការត្រួតត្រានៃគណបក្សរួបរូមរុស្ស៊ី(United Russia)របស់លោកពូទីន បានបង្ហាញពីសារក្នុងស្រុករបស់វិមានក្រឹមឡាំង ដែលធ្វើឡើងម្តងហើយម្តងទៀតក្នុងរយៈពេលយ៉ាងយូរថា លោកពូទីន គឺជាអ្នកធានាខុសត្រូវស្ថិរភាពដ៏រឹងមាំបំផុត។

ប៉ុន្តែក្នុងការបោះឆ្នោត នៅតំបន់ខ្លះ ការប្រកួតប្រជែងការបោះឆ្នោតនេះ មានកម្រិត ដោយសារបេក្ខជនលេចធ្លោជាច្រើនរូប ក្នុងនោះរួមទាំងមួយចំនួនមកពីគណបក្សកុម្មុយនីស្តធំរបស់រុស្ស៊ីផងដែរ ត្រូវបានរារាំងមិនឲ្យឈរឈ្មោះពីសំណាក់ពួកអាជ្ញាធរ។

បេក្ខភាពដែលគាំទ្រដោយវិមានក្រឹមឡាំង ក៏បានឈ្នះផងដែរនៅក្នុងតំបន់ចំនួនបួនរបស់អ៊ុយក្រែន ដែលរងការបំផ្លិចបំផ្លាញដោយសង្រ្គាម គឺ Donetsk, Luhansk, Zaporizhzhia និង Kherson ដែលតំបន់ទាំង៤នេះ ត្រូវបានទីក្រុងម៉ូស្គូប្រកាសថា ជាទឹកដីរបស់ខ្លួនកាលពីឆ្នាំមុន នៅក្នុងការដាក់បញ្ចូលជាឧបសម្ព័ន្ធដែលទទួលរងការបរិហារដោយក្រុងគីវ និងសម្ព័ន្ធមិត្តថា ជាទង្វើខុសច្បាប់។

យោងតាមមន្ត្រីរុស្ស៊ី បានឲ្យដឹងថា គណបក្ស United Russia ទទួលបានសំឡេងភាគច្រើន នៅក្នុងតំបន់ ដោយទទួលបានសំឡេងយ៉ាងតិច ៧០ភាគរយ សម្រាប់ការបោះឆ្នោតនៃតំបន់នីមួយៗ។ តែយ៉ាងណាក្ដី តួលេខនៃការបោះឆ្នោតលម្អិត មិនត្រូវបានបញ្ចេញឲ្យដឹងភ្លាមៗនោះឡើយ៕