ក្រុមនគរបាលនិយាយថា អំឡើងហិង្សា បានផ្ទុះឡើងនៅរដ្ឋភាគឦសាន Manipur របស់ប្រទេសឥណ្ឌា ពេលដែលក្រុមប្រដាប់អាវុធ បានផ្ទុះអាវុធដាក់គ្នាជាមួយកងកម្លាំងសន្តិសុខ បណ្តាលឲ្យមនុស្សយ៉ាងហោច ២នាក់ បាត់បង់អាយុជីវិត ។

ពួកគេបន្តថា ការបាញ់ប្រហារនេះ បានកើតឡើងនៅភូមិ Pallel នៃរដ្ឋ Manipur ហើយក្រោយពីមានសេចក្តីរាយការណ៍ពីករណីបាញ់ប្រហារនេះ មនុស្សរាប់រយនាក់ មកពីកុលសម្ព័ន្ធ Meiti បានរួសរាន់ទៅកាន់កន្លែងកើតហេតុ ដោយមានការព្រួយបារម្ភពីការវាយប្រហាររបស់ក្រុមកុលសម្ព័ន្ធ Kuki ។

ក្រុមនគរបាល និយាយថា ពួកគេបានបាញ់ឧស្ម័នបង្ហូរទឹកភ្នែក ដើម្បីបំបែកក្រុមមនុស្សទាំងអស់នេះ ហើយមន្រ្តីកងទ័ពម្នាក់ និងនគរបាល ៣នាក់ ស្ថិតនៅក្នុងចំណោមមនុស្ស ១៤០នាក់ដែលបានរងរបួស ។

នគរបាលរាយការណ៍ថា មនុស្ស ២នាក់ បានស្លាប់ ប៉ុន្តែទីភ្នាក់ងារព័ត៌មាន Press Trust of India រាយការណ៍ថា មនុស្សម្នាក់ទៀត បានស្លាប់នៅក្នុងមន្ទីរពេទ្យ ដោយសារតែរបួសក្បាលធ្ងន់ធ្ងរខ្លាំងពេក ។

ក្រុមនគរបាល បាននិយាយនៅលើបណ្តាញព័ត៌មានសង្គម Twitterថា ការផ្ទុះអាវុធនេះ មិនមែនរវាងសហគមន៍ក្រុមកុលសម្ព័ន្ធឡើយ ប៉ុន្តែវាគឺជាអំពើហិង្សាពាក់ព័ន្ធនឹងក្រុមប្រដាប់អាវុធគ្មានអត្តសញ្ញាណ និងកងកម្លាំងសន្តិសុខ ។

សូមបញ្ជាក់ថា រដ្ឋ Manipur បានរងភាពរង្គោះរង្គើដោយសារអំពើហិង្សារវាងក្រុមកុលសម្ព័ន្ធ ចាប់តាំងពីដើមខែឧសភារហូតមក ។ មនុស្សជាង ១៥០នាក់ ត្រូវបានសម្លាប់ ហើយមនុស្សជាង ៦ម៉ឺននាក់ទៀត បានរត់ភៀសខ្លួន ៕