ពានរង្វាន់សម្ដេចតេជោ ហ៊ុន សែន ឬពាន Hun Sen Cup លើកទី១៧ ថ្នាក់ខេត្ត ឆ្នាំ២០២៣ នឹង​បន្ដការប្រកួតនាថ្ងៃទី១៣ ខែកញ្ញានេះ បន្ទាប់ពីសម្រាករយៈពេល ២សប្ដាហ៍ ។ ជាមួយ​ការ​ត្រឡប់​មក​វិញនេះ គឺមាន ៣ប្រកួត ខណៈពូលA មាន ២ប្រកួត ដែលជាជំនួបបង្គ្រប់កិច្ច បន្ទាប់​ពី​រក​ឃើញ​បេក្ខភាពវគ្គបន្ដ ស្របពេលពូលC មាន ១ប្រកួត ដោយក្រុមយុវជនខេត្តបាត់ដំបង ត្រូវ​ជួប​ក្រុម​សូហ្វីយ៉ាប៉ៃលិន ។

សម្រាប់កម្មវិធីប្រកួតពូល A រួមមានក្រុមកំពតអេហ្វស៊ី ជួបខេត្តកំពង់ស្ពឺ បង្គ្រប់សប្ដាហ៍ទី១២ និង​ខេត្ត​ព្រះសីហនុ ជួបក្រុមភ្ញៀវភ្នំពេញហ្គាឡាក់ស៊ី បង្គ្រប់សប្ដាហ៍ទី១៦ ។ ជាការ​ពិត​ពូល​A ​បាន​រក​ឃើញ​ក្រុម​ឡើងវគ្គ ៨ក្រុមចុងក្រោយហើយ គឺក្រុមភ្នំពេញហ្គាឡាក់ស៊ី ឈរលេខ១ និង​ខេត្ត​ព្រះសីហនុ ​ឈរលេខ២ ។ ដូច្នេះទោះបីលទ្ធផលចុងក្រោយស្អែកនេះយ៉ាងណា ក៏គ្មាន​ការ​ប្រែប្រួល​នោះ​ដែរ លើកលែងជំនួបរវាងកំពតអេហ្វស៊ី និងខេត្តកំពង់ស្ពឺ ដែលក្រុមឈ្នះ នឹង​ត្រូវ​ឈរ​លេខ​៣ ក្នុងពូល ។



ដោយឡែកជំនួបបង្គ្រប់សប្ដាហ៍ទី១៧ រវាងក្រុមយុវជនបាត់ដំបង និងក្រុមសូហ្វីយ៉ាប៉ៃលិន គឺ​ជា​ជំនួប​ដ៏​សំខាន់ ដែលក្រុមភ្ញៀវបាត់ដំបង ត្រូវការជ័យជម្នះ ដើម្បី​មាន​ឱកាស​ចាំ​អ៊ុត​ដំណើរ​ឆ្ពោះ​ទៅ​វគ្គ​បន្ដ​ ដ្បិតបច្ចុប្បន្នក្រុមយុវជនបាត់ដំបង មាន ១១ពិន្ទុ ប្រទាញប្រទុងជាមួយក្រុមឈើតុំ-ខេត្ត​ពោធិ៍សាត់ ដែលមាន ១២ពិន្ទុ និងនៅសល់ ១ប្រកួតក្នុងដៃដូចគ្នា ។ ប៉ុន្ដែ​ករណី​បើការ​ប្រកួត​បញ្ចប់​ពូល បាត់ដំបង ធ្វើពុំបានល្អទេនោះ ពួកគេនឹងត្រូវប្រឈមរបូតឱកាសឡើងវគ្គ ៨ក្រុម​ចុង​ក្រោយ​តែ​ម្ដង។

គួរដឹងថា ការប្រកួតពានរង្វាន់សម្ដេចតេជោ ហ៊ុន សែន ថ្នាក់ខេត្ត ឆ្នាំនេះ បាន​ចាប់​ផ្ដើម​ការ​ប្រកួត​ជម្រុះ​តាមពូល កាលពីចុងខែមីនា ឆ្នាំ២០២៣ មានបេក្ខភាព ២០ក្រុមចូលរួម និងបែងចែកជា ៤​ពូល ក្នុងមួយពូលមាន ៥ក្រុម ដើម្បីធ្វើការប្រកួតសន្សំពិន្ទុ និងចម្រាញ់បានក្រុមខ្លាំង ២​ក្រុម​ក្នុងមួយ​ពូលឡើងទៅវគ្គ ៨ក្រុមចុងក្រោយ បន្ទាប់ពីធ្វើការប្រកួតចំនួន ២ជុំ៕ អត្ថបទ លី ឈុនឡា