អង់គ្លេស ៖ នាយករដ្ឋមន្ត្រីចក្រភពអង់គ្លេស រីស៊ី ស៊ុណាក់ (Rishi Sunak) បានថ្លែងប្រាប់សភា កាលពីថ្ងៃទី១១ ខែកញ្ញា ដោយដកស្រង់ទិន្នន័យស៊ើបការណ៍របស់ចក្រភពអង់គ្លេសថា ប្រទេសរុស្ស៊ី បានវាយប្រហារដោយមីស៊ីល ដើម្បីពន្លិចនាវាស៊ីវិល នៅក្នុងកំពង់ផែសមុទ្រខ្មៅ Odesa របស់ប្រទេសអ៊ុយក្រែន កាលពីថ្ងៃទី២៤ ខែសីហា។  

សារព័ត៌មាន The Guardian បានដកស្រង់សម្តីលោកស៊ុណាក់ថា៖«ខ្ញុំអាចប្រាប់សភាថ្ងៃនេះថា ដោយសារការស៊ើបការណ៍សម្ងាត់ដែលប្រកាសជាចំហ យើងដឹងថា យោធារុស្ស៊ី បានកំណត់គោលដៅលើកប៉ាល់ដឹកទំនិញស៊ីវិល នៅសមុទ្រខ្មៅ ជាមួយនឹងមីស៊ីលជាច្រើនគ្រាប់ កាលពីថ្ងៃទី២៤ ខែសីហា។

ក្រោយមក ការិយាល័យការបរទេសរបស់ចក្រភពអង់គ្លេស បាននិយាយថា ការវាយប្រហារនេះ ត្រូវបានរារាំងដោយការការពារដែនអាកាសរបស់អ៊ុយក្រែន ដោយបានបាញ់ទម្លាក់មីស៊ីល«ដែលហោះសំដៅទៅកំពង់ផែOdesa»។

របាយការណ៍នោះ បានឲ្យដឹងថា៖«មីស៊ីលទាំងនោះដែលរួមមានមីស៊ីលតម្រង់គោលដៅ Kalibr ចំនួនពីរគ្រាប់ដែលបាញ់ចេញពីនាវាផ្ទុកមីស៊ីលរបស់កងនាវាសមុទ្រខ្មៅ ត្រូវបានបាញ់ទម្លាក់ដោយជោគជ័យដោយកងកម្លាំងអ៊ុយក្រែន កាលពីថ្ងៃទី២៤ ខែសីហា។