រុស្ស៊ី ៖ ទីក្រុង Vladivostok ចុងបូព៌ារបស់រុស្ស៊ី បានស្វាគមន៍អ្នកចូលរួមរាប់ពាន់នាក់សម្រាប់វេទិកាសេដ្ឋកិច្ចបូព៌ាលើកទី៨ ដើម្បីជំរុញកិច្ចសហប្រតិបត្តិការសេដ្ឋកិច្ចនិងការផ្លាស់ប្តូរវប្បធម៌ ក្នុងចំណោមតំបន់នានា នៅអាស៊ី-ប៉ាស៊ីហ្វិក។ ក្រោមប្រធានបទ«ដំណើរទៅកាន់កិច្ចសហប្រតិបត្តិការ សន្តិភាព និងវិបុលភាព» វេទិកានៅឆ្នាំនេះ បានទាក់ទាញអ្នកចូលរួមប្រមាណ៧ពាន់នាក់ ពិតជាមានសារៈសំខាន់សម្រាប់សេដ្ឋកិច្ចរុស្ស៊ី ខណៈប្រទេសលោកខាងលិច បានដាក់ទណ្ឌកម្មតឹងរ៉ឹងលើប្រទេសនេះដោយសារតែវិបត្តិនៅអ៊ុយក្រែន។ ដូច្នេះហើយរុស្ស៊ីមើលឃើញការសហការជាមួយដៃគូនៅអាស៊ីរបស់ខ្លួនជាការសំខាន់។ មានសកម្មភាពជាច្រើននៅក្នុងវេទិកានេះ ហើយបរិយាកាសពិតជារីករាយ ខណៈសេដ្ឋកិច្ចរុស្ស៊ីរកឃើញការផ្តោតសំខាន់ថ្មីៗ។ ដោយដឹងថាទំនាក់ទំនងរបស់ខ្លួនជាមួយប្រទេសលោកខាងលិច នឹងពុំត្រូវបានបង្កើតជាថ្មីឡើងវិញឆាប់ៗនៅពេលណាមួយនោះ រុស្ស៊ីកំពុងដាក់ជំនួសផលិតផលនិងបច្ចេកវិទ្យាប្រទេសលោកខាងលិចជាមួយទំនាក់ទំនងក្នុងស្រុកខណៈកំពុងស្វែងរកដៃគូថ្មីជាចម្បងមកពីប៉ែកបូព៌ា។ ក្នុងចំណោមដៃគូថ្មីសំខាន់របស់រុស្ស៊ីគឺប្រទេសចិន។ ក្រុមហ៊ុនផលិតទង់ដែងធំបំផុតមួយរបស់រុស្ស៊ី មានបំណងចាប់ផ្តើមដឹកជញ្ជូនទៅកាន់ប្រទេសចិន ក្នុងរយៈពេលពីរទៅបីខែខាងមុខនេះ។ លោក Nikola Gudkov នាយកផ្នែកទំនាក់ទំនងជាមួយក្រុមហ៊ុនរុករករ៉ែ Udokan Copper និយាយថាយើងបានពិចារណាទីផ្សាររបស់ចិនជាអាទិភាពរបស់យើង ព្រោះទៅតាំងស្ថិតនៅក្នុងតំបន់ Zabaykal មានព្រំដែនជាប់ប្រទេសចិន។ ទីតាំងរបស់ក្រុមហ៊ុនគឺផ្តល់អំណោយផល ខណៈយើងអាចដឹកជញ្ចូនផលិតផលសម្រេចតាមដីគោកកាត់តាមព្រំដែនភាគខាងត្បូង ទៅកាន់ភាគខាងជើងប្រទេសចិន ហើយក៏តាមសមុទ្រផងដែរទៅកាន់កំពង់ផែប្រទេសចិន។ ទំហំនៃច្រករបៀងដឹកជញ្ចូន មានសារៈសំខាន់សម្រាប់មិនត្រឹមតែផែនការនាំចេញរបស់ក្រុមហ៊ុន Udokan ទៅកាន់ប្រទេសចិន ប៉ុណ្ណោះទេ ប៉ុន្តែថែមទាំងសម្រាប់ពាណិជ្ជកម្មដ៏ទៃទៀត។ កិច្ចព្រមព្រៀងមួយក្នុងចំណោមកិច្ចព្រមព្រៀងជាច្រើន ដែលបានចុះហត្ថលេខាកាលពីថ្ងៃចន្ទ ក្នុងទីក្រុង Vladivostok រវាងភាគីចិន និងរុស្ស៊ី ផ្តោតលើអគារស្ថានីយ៍គ្រាប់ធញ្ញជាតិថ្មី។