អាមេរិក ៖ ប្រធានាធិបតីអាមេរិក លោក ចូបៃដិន ពុំសម្រេចបានជោគជ័យនៅឯកិច្ចប្រជុំកំពូល កាលពីចុងសប្តាហ៍ នៅប្រទេសឥណ្ឌា ក្នុងការបង្រួបបង្រួមមេដឹកនាំពិភពលោកឲ្យថ្កោលទោស ចំពោះសង្គ្រាមរបស់រុស្ស៊ី នៅអ៊ុយក្រែន ដោយនាំឲ្យមានការរិះគន់ពីទីក្រុងគីវ និងធ្វើឲ្យរូបលោកស្ថិតក្រោមការវាយប្រហារ នៅពេលរូបលោកបញ្ចប់ដំណើរទៅក្រៅប្រទេស។

ទាំងប្រធានាធិបតីរុស្ស៊ី លោក វ្ល៉ាឌីមៀរ ពូទីន ទាំងប្រធានាធិបតីចិន លោក ស៊ី ជីនពីង មិនបានចូលរួមក្នុងការជួបប្រជុំគ្នា នៅទីក្រុងញូវដេលី សម្រាប់មេដឹកនាំនៃបណ្តាប្រទេស ដែលមានឧស្សហកម្ម និងសេដ្ឋកិច្ចខ្លាំងបំផុតលើពិភពលោកទាំង២០ ឬG20 ប៉ុន្តែទោះបីជាអវត្តមានក៏ដោយ ក៏រុស្ស៊ី និងចិន បានទទួលបានជ័យជម្នះលើសហរដ្ឋអាមេរិកដែរ នៅពេលដែលកិច្ចប្រជុំនោះ ឈានដល់ការរួបរួមគ្នារបស់សហគមន៍អន្តរជាតិដើម្បីប្រឆាំងនឹងសង្រ្គាម ដែលបានចាប់ផ្តើមជាងមួយឆ្នាំកន្លះមុន។

នៅទីបំផុត ក្រុមប្រទេសចំនួន២០ បានបដិសេធមិនស្ដីបន្ទោសចំៗដល់រុស្ស៊ី ចំពោះការលុកលុយនោះ ដោយត្រឹមតែនិយាយជំនួសមកវិញថា បណ្តាប្រទេសទាំងអស់ «ត្រូវតែជៀសវាងពីការគំរាមកំហែង ឬការប្រើប្រាស់កម្លាំង ដើម្បីស្វែងរកការដណ្តើមយកទឹកដី» និងបានលើកឡើងពី «ការឈឺចាប់របស់មនុស្ស និងផលប៉ះពាល់អវិជ្ជមានពីការមានសង្រ្គាម»។

បន្ទាប់ពីចូលរួមកិច្ចប្រជុំកំពូល នៅទីក្រុងញូវដេលី លោក បៃដិន បានធ្វើដំណើរទៅកាន់ទីក្រុងហាណូយ ដែលជាដំណើរទស្សនកិច្ចមួយ ក្នុងគោលបំណងពង្រឹងទំនាក់ទំនងជាមួយប្រទេសវៀតណាម។ លោកគ្រោងនឹងចាកចេញពីប្រទេសវៀតណាម នៅថ្ងៃចន្ទ ដើម្បីឆ្ពោះទៅរដ្ឋអាឡាស្កា ជាកន្លែង ដែលលោកគ្រោងនឹងប្រារព្ធខួបលើកទី២២ នៃការវាយប្រហារថ្ងៃទី១១ ខែកញ្ញា ឆ្នាំ២០០១ លើមជ្ឈមណ្ឌលពាណិជ្ជកម្មពិភពលោក និងមន្ទីរបញ្ចកោណ។

តែទោះជាមិនមានការរួមគ្នាថ្កោលទោសក្ដី ក៏មេដឹកនាំកំពូលរបស់អាមេរិករូបនេះ ហាក់មិនស្ដីបន្ទោសដល់បណ្ដាប្រទេសទាំងនោះឡើយ ដោយនៅក្នុងសន្និសីទសារព័ត៌មាននៅវៀតណាម បន្ទាប់ពីកិច្ចប្រជុំកំពូលនេះ លោក បៃដិន បាននិយាយថា សង្គ្រាមមិនមែនជាបញ្ហា «ជ្រុងមួយ» ជាមួយក្រុមប្រទេស G20 ភាគច្រើននោះទេ ពោលគឺនោះជាបញ្ហាជាមួយរុស្ស៊ី និងចិន ដែលមានតំណាងជាន់ខ្ពស់ នៅក្នុងកិច្ចប្រជុំកំពូលនេះ៕