ចិន ៖ ក្រសួងសន្តិសុខរដ្ឋរបស់ប្រទេសចិន ឲ្យដឹងថា ពលរដ្ឋអាមេរិកម្នាក់ ដែលត្រូវបានកាត់ទោសឲ្យជាប់ពន្ធនាគារអស់មួយជីវិត ពីបទចារកម្ម កាលពីដើមឆ្នាំនេះ បានធ្វើការជាមន្ត្រីចារកម្ម សម្រាប់ទីភ្នាក់ងារស៊ើបការណ៍សម្ងាត់អាមេរិកអស់រយៈពេលជាង ៣ទសវត្សរ៍មកហើយ។

កាលពីថ្ងៃចន្ទ (ទី១១ ខែកញ្ញា) ក្រសួងបានចេញផ្សាយនូវប្រវត្តិរបស់បុរស ដែលមានសិទ្ធិស្នាក់នៅអចិន្ត្រៃយ៍ ក្នុងទីក្រុងហុងកុង ហើយមានកាន់លិខិតឆ្លងដែនរបស់អាមេរិក។ តុលាការ ក្នុងខេត្ត Jiangsu ភាគខាងកើតប្រទេសចិន បានសម្រេចក្ដីឲ្យបុរសនោះជាប់ទោសអស់មួយជីវិត កាលពីខែឧសភា។ នៅពេលនោះ ជនជាប់ចោទ មានវ័យ ៧៨ឆ្នាំ។

ក្រសួងបានឲ្យដឹងថា បុរសនោះបានចុះហត្ថលេខាលើកិច្ចព្រមព្រៀងមួយ ក្នុងឆ្នាំ១៩៨៩ ដើម្បីសហការជាមួយ និងទទួលបានការបង់ប្រាក់ពីទីភ្នាក់ងារស៊ើបការណ៍សម្ងាត់របស់អាមេរិក។ ក្រសួងបន្តថា ក្នុងនាមជាចារកម្មអាមេរិក បុរសនោះបានតាមដានជនជាតិចិន និងជនជាតិចិន នៅបរទេស ក្នុងទឹកដីសហរដ្ឋអាមេរិក ហើយរាយការណ៍ទៅកាន់ទីភ្នាក់ងារស៊ើបការណ៍សម្ងាត់។

ក្រសួងបញ្ជាក់បន្ថែមថា បុរសនោះបានធ្វើជាចារកម្ម នៅក្នុងប្រទេសចិន តាមការបញ្ជា តាំងពីឆ្នាំ២០២០ នៅពេលដែលវីរុសកូរ៉ូណា កំពុងរីករាលដាល ជុំវិញពិភពលោក។ ជាមួយគ្នានេះ ក្រសួងប្រហែលជាបានប្រកាសព័ត៌មានលម្អិតបន្ថែមអំពីបុរសនេះ ព្រោះចង់ក្រើនរំលឹកពលរដ្ឋឲ្យមានការប្រុងប្រយ័ត្ន។

ពាក់ព័ន្ធនឹងចារកម្មនេះ មេដឹកនាំរបស់ប្រទេសចិន លោកប្រធានាធិបតីចិន ស៊ី ជីនពីង បាន និងកំពុងអំពាវនាវប្រជាពលរដ្ឋចូលរួមប្រយុទ្ធប្រឆាំងនឹងចារកម្ម ដោយនិយាយថា ការងារប្រឆាំងចារកម្មទាមទារឲ្យមានការរួមគ្នាគ្រប់ផ្នែកទាំងអស់នៃសង្គម៕