ម្ចាស់ជ័យលាភីណូបែលសន្តិភាពហ្វីលីពីនលោកស្រី Maria Ressa និងគេហទំព័រ Rappler របស់លោកស្រី ត្រូវបានឲ្យរួចទោសក្នុងករណីក្លែងបន្លំពន្ធ ដោយសាលាក្តីនៅថ្ងៃអង្គារនេះ ដែលជាជ័យជំនះផ្លូវច្បាប់មួយទៀត សម្រាប់អ្នកសារព័ត៌មានជម្លោះ និងសេរីភាពសារព័ត៌មាន ក្នុងប្រទេសនៅអាស៊ីអាគ្នេយ៍មួយនេះ ។

 លោកស្រី Ressa ដែលបានឈ្នះពានរង្វាន់ណូបែលសន្តិភាពកាលពីឆ្នាំ ២០២១ ជាមួយអ្នកសារព័ត៌មានរុស្ស៊ី គឺជាប្រធានគេហទំព័រ Rappler ដែលទទួលបានកេរ្តិ៍ឈ្មោះសម្រាប់ការពិនិត្យពិច័យដ៏តឹងរឹងរបស់ពួកគេលើអតីតប្រធានាធិបតីហ្វិលីពីនលោក Rodrigo Duterte និងសង្រ្គាមប្រឆាំងគ្រឿងញៀនសម្លាប់មនុស្សរបស់គាត់ ។

 ការរួចទោសរបស់លោកស្រី Ressa ត្រូវបានគេរំពឹងថានឹងកើតមាន ក្រោយពេលលោកស្រីត្រូវបានគេឲ្យរួចទោសលើការចោទប្រកាន់ករណីក្លែងបន្លំពន្ធស្រដៀងគ្នា កាលពីរយៈពេល ៩ខែមុន។

 លោកស្រី Ressa វ័យ ៥៩ឆ្នាំ បច្ចុប្បន្នស្ថិតនៅក្រៅឃុំ ដោយការដាក់ប្រាក់តម្កល់ ហើយត្រូវបានតុលាការកាត់ទោសកាលពីឆ្នាំ ២០២០ ពាក់ព័ន្ធនឹងបទបរិហារកេរ្តិ៍តាមប្រព័ន្ធអ៊ីនធឺណិត ដែលស្ថិតនៅក្នុងចំណោមករណីចោទប្រកាន់ជាច្រើនទៀតប្រឆាំងនឹងគេហទ័ព័ររបស់លោកស្រី ដោយទីភ្នាក់ងារដ្ឋាភិបាល ។ លោកស្រីនិយាយថា ករណីចោទប្រកាន់ទាំងអស់នេះ ផ្តើមចេញពីរឿងនយោបាយប៉ុណ្ណោះ ។

 លោកស្រី Ressaនិយាយថា ការឲ្យរួចទោសលើកនេះ បច្ចុប្បន្នពង្រឹងការតាំងចិត្តរបស់ពួកយើង ដើម្បីបន្តជាមួយប្រព័ន្ធយុត្តិធម៌ បញ្ជូនខ្លួនពួកយើងទៅកាន់តុលាការ បើទោះបីជាវាគឺជាភាពអាម៉ាស់នយោបាយក៏ដោយ ។ ថ្វីត្បិតែមានការវាយប្រហារលើសេរីភាពសារព័ត៌មានយ៉ាងណាក៏ដោយ វាបង្ហាញថា ប្រព័ន្ធតុលាការដំណើរការវិញហើយ ហើយពួកយើងសង្ឃឹមថានឹងមើលឃើញការចោទប្រកាន់សេសសល់ នឹងត្រូវច្រានចោលបន្តទៀត ៕