មេដឹកនាំកូរ៉េខាងជើង លោក គីម ជុងអ៊ុន បានធ្វើដំណើរតាមរថភ្លើងទៅដល់ប្រទេសរុស្ស៊ីហើយ ជាទីដែលលោក ត្រូវជួបជាមួយប្រធានាធិបតីរបស់ប្រទេសនេះ គឺលោក វ្ល៉ាឌីមៀរ ពូទីន។

នៅមុនជំនួប ដែលគ្រោងទុកនេះ មានការបញ្ចេញព័ត៌មានជាច្រើនមកថា ទីក្រុងមូស្គូចង់ទិញគ្រាប់រំសេវរបស់កូរ៉េខាងជើង សម្រាប់សង្គ្រាមរបស់ខ្លួន នៅអ៊ុយក្រែន ហើយទន្ទឹមនឹងនោះ ក៏មានការលើកឡើងពីអ្នកវិភាគ ដែលថា កូរ៉េខាងជើង ចង់បានជំនួយស្បៀងអាហារ និងអាចជាបច្ចេកវិទ្យា ដើម្បីជួយដល់កម្មវិធីនុយក្លេអ៊ែរ និងមីស៊ីលរបស់ខ្លួន ដែលត្រូវបានសហគមន៍អន្តរជាតិហាមឃាត់។

ប៉ុន្តែយ៉ាងណាក្ដី នៅមិនទាន់ច្បាស់ទេថា មេដឹកនាំទាំង២ នឹងជួបគ្នានៅទីណា ដោយរថភ្លើងរបស់លោក គីម ត្រូវបានគេរាយការណ៍ថា កំពុងធ្វើដំណើរឆ្ពោះទៅភាគខាងជើងឆ្ងាយពីទីក្រុងវ៉្លាឌីវ៉ូស្តុក (Vladivostok)។

ចំណុចនៃការប្រជុំមួយ ដែលអាចធ្វើទៅបាន គឺមជ្ឈមណ្ឌលអវកាស Vostochny នៅចុងភាគខាងកើតរបស់រុស្ស៊ី។ នេះជាដំណើរទៅក្រៅប្រទេសលើកដំបូងរបស់លោក គីម ក្នុងរយៈពេល ៤ឆ្នាំ ដោយជំនួបលើកចុងក្រោយរបស់លោកជាមួយលោក ពូទីន គឺនៅក្នុងឆ្នាំ២០១៩៕