មន្ត្រីម្នាក់បាននិយាយកាលពីថ្ងៃអង្គារបន្ទាប់ពីចុះពិនិត្យតំបន់ដែលត្រូវបានបំផ្លាញថា ក្រុម​មន្ត្រី​នៅ​ប្រទេស​លីប៊ី​ភាគខាងកើត បានស្រង់យកសាកសពជនរងគ្រោះជាង ១.០០០នាក់ ពី​កម្ទេច​កម្ទី​នៅ​ទី​ក្រុងឆ្នេរ ដែលបានជន់លិចដោយទឹកជំនន់ដ៏មហន្តរាយ។

អ្នកនាំពាក្យក្រសួងមហាផ្ទៃ និយាយថា ចំនួនអ្នកស្លាប់ បានកើនលើសពី៥.៣០០នាក់ ដែល​បាន​ស្លាប់​នៅ​ក្នុងទីក្រុង Derna តែមួយដោយសារទឹកជំនន់វាយបោកបក់ដោយព្យុះ Daniel ពីសមុទ្រ​ម៉េឌីទែរ៉ាណេ។

លោក Tamer Ramadan បេសកជនពិសេសប្រចាំប្រទេសលីប៊ី របស់​សហព័ន្ធ​អន្តរជាតិ​នៃ​កាក​បាទ​ក្រហម និង​សមាគមអឌ្ឍន៍ចន្ទក្រហម កាលពីពេលមុនបាននិយាយថា មនុស្ស ១ម៉ឺននាក់​បាន​បាត់​ខ្លួនបន្ទាប់ពីទឹកជំនន់ពុំធ្លាប់មានពីមុនមក។ និយាយ​ទៅ​កាន់​អ្នក​សារ​ព័ត៌មាន​ក្នុង​សន្និសីទ​អង្គការសហប្រជាជាតិ ក្នុងទីក្រុងហ្សឺណែវ តាមរយៈសន្និសីទវីដេអូពីប្រទេសទុយនីស៊ី លោក​បាន​និយាយថា ចំនួនអ្នកស្លាប់មានទំហំធំ ហើយត្រូវបានរំពឹងថា ឈាន​ដល់​រាប់​ពាន់​នាក់​នៅ​ពេល​ប៉ុន្មានថ្ងៃខាងមុខ។ ប្រធានអង្គការ Japan Chapagain បាន​និយាយ​នៅ​លើ​បណ្តាញ​ផ្សព្វ​ផ្សាយ​សង្គមថា អ្នកស្ម័គ្រ​ចិត្ត​សហព័ន្ធ​អន្តរជាតិ នៃ​កាក​បាទ​ក្រហម​ និង​សមាគម​អឌ្ឍន៍​ចន្ទ​ក្រហម​បាន​ស្លាប់ខណៈជួយជនរងគ្រោះដោយទឹកជំនន់។

ទីភ្នាក់សារព័ត៌មានរ៉យទ័បានដកស្រង់សម្តីលោក Hichem Chkiouat រដ្ឋមន្ត្រី​អាកាសចរណ៍​ស៊ីវិល និងជាសមាជិកគណៈកម្មាធិការសង្គ្រោះបន្ទាន់ សម្រាប់​រដ្ឋបាល​នៅ​ប្រទេស​លីប៊ី​ភាគ​ខាង​កើត​ និយាយក្នុងបទសម្ភាសន៍តាមទូរស័ព្ទថា «ខ្ញុំបានត្រលប់មកពីទីក្រុង Derna។ វាពិត​ជា​មហន្តរាយ​ខ្លាំង​។ សាកសពមាននៅគ្រប់ទីកន្លែង នៅក្នុងសមុទ្រ នៅតាមជ្រលងភ្នំ និង​នៅ​ក្រោម​អគារ​៕ អត្ថបទ៖ សុខមាន