ស៊ីហ្គេម៖ សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានឯកភាព និងកំណត់ប្រភេទកីឡាវិញ្ញាសា និងទីតាំងនៃទីលានប្រកួតលើកទី១ សម្រាប់ការប្រកួតកីឡាស៊ីហ្គេមឆ្នាំ២០២៣ នៅកម្ពុជាហើយ។ នេះបើតាមការឲ្យដឹងពីឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC។
យោងតាមការសម្រេចរបស់សម្ដេចពិជ័យសេនា ទៀ បាញ់ កីឡាដែលត្រូវបានកំណត់លើកទី១ ត្រៀមស៊ីហ្គេមជាប្រវត្តិសាស្ត្រនេះគឺមាន ៤០ប្រភេទកីឡា និងបែងចែកជា ៣ចំណាត់ថ្នាក់ ទី១-ប្រភេទកីឡាកាតព្វកិច្ច រួមមានកីឡាអត្តពលកម្ម និងកីឡាហែលទឹក។ ទី២-ប្រភេទកីឡាអូឡាំពិក និងកីឡាអាស៊ី រួមមានកីឡាកាយសម្ព័ន្ធ, បាញ់កាំភ្លើង, តេក្វាន់ដូ WTF, ទោចក្រយាន, គុនដាវ, យូដូ, វូស៊ូ, ចំបាប់, ប្រដាល់សកល, ការ៉ាតេ, កីឡារាំ, ទ្រីយ៉ាត្លុង, ជូជិតស៊ូ, លើកទម្ងន់, កីឡាទូកនូកានូ-កាយ៉ាក់ និងរ៉ូអ៊ីង, បាល់ទាត់, បាល់ទះ, បាល់បោះ, ស៊ីដក់-ឈិនឡូន, វាយកូនឃ្លីលើតុ, វាយសី, វាយកូនបាល់, វាយកូនហ្គោល, ហុកគី, ជិះសេះ, ទូកក្ដោង និងកីឡាសូហ្វតេន្នីស។ ចំណែកទី៣ គឺប្រភេទកីឡាក្នុងតំបន់ និងកីឡាប្រពៃណី រួមមានកីឡាវ៉ូវីណាម, ប្រដាល់គុនខ្មែរ, ឃីកបុកស៊ីង, ម៉ូតូទឹក, Finswimming, ប៉េតង់, កាយវប្បកម្ម, កីឡាអុក, អេឡិចត្រូនិច, គុនល្បុក្កតោ និងកីឡាតេក្វាន់ដូ ITF។
កីឡាទាំង ៤០ប្រភេទនេះ ត្រូវបានកំណត់ទីតាំង នៃទីលានប្រកួតចំនួន ៥ទីតាំងធំៗ រួមមាននៅរាជធានីភ្នំពេញ ខេត្តព្រះសីហនុ ខេត្តសៀមរាប ខេត្តកំពត និងខេត្តកែប។ ប៉ុន្ដែរាជធានីភ្នំពេញដែលជាកន្លែងប្រមូលផ្ដុំប្រកួតប្រភេទកីឡាជាច្រើន នឹងត្រូវរប្រកួតលើទីតាំងផ្សេងៗ ដូចជាពហុកីឡដ្ឋានជាតិមរតកតេជោ, ពហុកីឡដ្ឋានជាតិ, សាលមជ្ឈមណ្ឌលសន្និបាត និងពិព័រណ៍អន្ដរជាតិជ្រោយចង្វារ, សាកលវិទ្យាល័យភូមិន្ទភ្នំពេញ, កីឡដ្ឋានស្ដាតចាស់, ទីលានវាយកូនគោលហ្គាឌិនស៊ីធី និងមជ្ឈមណ្ឌល CCC ជាដើម។ យ៉ាងណាក្ដីឯកឧត្តម វ៉ាត់ ចំរើន បានមានប្រសាសន៍ថា នេះគឺជាការសម្រេចបឋមលើកទី១ មិនទាន់សម្រេចជាស្ថាពរនោះទេ ព្រោះសល់ពេលវេលាច្រើនទៀតដើម្បីត្រួតពិនិត្យ និងវាយតម្លៃលើគុណផលកីឡា ពិសេសក្រោយចប់ស៊ីហ្គេមនៅវៀតណាមចុងឆ្នាំនេះ គណៈកម្មាធិការជាតិ CAMSOC នឹងធ្វើការជម្រុះប្រភេទកីឡាមួយទៀតឲ្យស្របតាមផែនការមេ ដែលកំណត់កីឡាចន្លោះ ៣០ ទៅ ៣៥ប្រភេទកីឡា សម្រាប់ដាក់ឲ្យប្រកួតក្នុងព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។
គួរបញ្ជាក់ថា ការកំណត់ប្រភេទកីឡា វិញ្ញាសា និងទីតាំងនៃទីលានប្រកួតកីឡាស៊ីហ្គេមនេះ គឺដើម្បីផ្ដល់លទ្ធភាពឲ្យគណៈកម្មការជំនាញ យកទៅរៀបចំផែនការតាមមុខជំនាញរបស់ខ្លួន ពិសេសគណៈកម្មការទីលានដើម្បីចុះពិនិត្យជាក់ស្ដែង និងវាយតម្លៃអំពីលក្ខណៈស្ដង់ដារ ស្របតាមលក្ខខណ្ឌសហព័ន្ធអន្ដរជាតិ សម្រាប់ត្រៀមស្វាគមន៍ការប្រកួតកីឡាស៊ីហ្គេមលើកទី៣២ ដែលគ្រោងរៀបចំពិធីបើកការប្រកួតផ្លូវការនាថ្ងៃទី៥ ខែឧសភា និងបញ្ចប់នៅថ្ងៃទី១៧ ខែឧសភា ឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
