សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៃព្រះរាជាណាចក្រកម្ពុជា នៅព្រឹកថ្ងៃទី១៣ ខែកញ្ញា ឆ្នាំ២០២៣នេះ បានជួបពិភាក្សាការងារជាមួយលោក Gaman Oleksandr ឯក​អគ្គ​រដ្ឋ​ទូត​តែង​តាំង​ថ្មី នៃប្រទេសអ៊ុយក្រែន ប្រចាំព្រះរាជាណាចក្រកម្ពុជា ខណៈ​កិច្ច​ជំនួប​នោះ​ភាគី​ទាំង​ពីរ​បាន​ពិភាក្សាគ្នាជាច្រើនក្នុងគោល បំណងលើកកម្ពស់កិច្ចសហប្រតិបត្តិការទ្វេភាគី។

ថ្លែងនៅក្នុងកិច្ចជំនួបនោះ សម្តេចប្រមុខរដ្ឋស្តីទីបានលើកឡើងថា ក្នុង​ព្រះបរមនាម​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុង​នាម​ព្រឹទ្ធសភា រដ្ឋសភា រាជរដ្ឋាភិបាលកម្ពុជា និងក្នុងនាមសម្តេចផ្ទាល់ បាន​សម្តែង​អំណរ​សាទរ​ស្វាគមន៍​ចំពោះ​លោក Gaman Oleksandr ដែលត្រូវបាន ឯកឧត្តមប្រធានាធិបតី នៃ​ប្រទេស​អ៊ុយក្រែន​ តែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសអ៊ុយក្រែន ប្រចាំ​ព្រះរាជា​ណាចក្រកម្ពុជា។

សម្តេចវិបុលសេនាភក្តី បានកត់សម្គាល់ដោយសេចក្តីរីករាយចំពោះទំនាក់ទំនង និង​កិច្ច​សហប្រតិបត្តិការ​ដ៏​ល្អរវាងកម្ពុជា និងអ៊ុយក្រែន ហើយសម្តេចមានជំនឿជឿជាក់ថា ក្នុង​ឋានៈ​លោក​ជា​ឯក​អគ្គរដ្ឋទូត នៃប្រទេសអ៊ុយក្រែនប្រចាំព្រះរាជាណាចក្រកម្ពុជា លោក​នឹង​បន្ត​ខិតខំ​ពង្រឹង​ពង្រីក​ចំណង​មិត្តភាព និងកិច្ចសហប្រតិបត្តិការលើគ្រប់វិស័យ រវាងប្រទេសទាំងពីរ និង​ប្រជាជន​ទាំង​ពីរឱ្យកាន់តែប្រសើរឡើងថែមទៀត។

សម្តេ​ចប្រមុខរដ្ឋស្តីទីបានគូសបញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាល ក្រសួង ស្ថាប័ន​ជាតិ​​នៃ​ព្រះរាជា​ណាចក្រកម្ពុជាត្រៀមខ្លួនជានិច្ច ដើម្បី​ធ្វើ​កិច្ច​សហប្រតិបត្តិការ​ដ៏​ជិត​ស្និទ្ធ​ជាមួយ​លោក​ឯក​អគ្គ​រដ្ឋទូត ដើម្បីលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការ នាំ​មក​នូវ​ផល​ប្រយោជន៍​ដ៏​ធំធេងទៅវិញទៅមកសម្រាប់ប្រជាជន និងប្រទេសទាំងពីរ។

ថ្លែងនៅក្នុងកិច្ចជំនួបនោះដែរលោកទូតក៏បានសម្តែងនូវការពេញចិត្ត និង​វាយ​តម្លៃ​ខ្ពស់​ចំពោះ​ទំនាក់​ទំនង និងកិច្ចសហប្រតិបត្តិការដ៏ល្អប្រពៃរវាងប្រទេសទាំងពីរ។ តាម​រយៈ​បេសកកម្ម​ការទូត​របស់​លោក​នៅ​ព្រះរាជាណាចក្រកម្ពុជា លោកនឹងខិតខំរួម​ចំណែក​ពង្រឹង​ពង្រីក​ទំនាក់​ទំនង​មិត្តភាព និងកិច្ចសហប្រតិបត្តិការដ៏ល្អប្រពៃរវាងរដ្ឋាភិបាល ប្រជាជន និងប្រទេស​ទាំងពីរ​ឱ្យ​កាន់​តែ​ល្អ​ប្រសើរ​ថែម​ទៀតផងដែរ៕ អត្ថបទ បាន ចក់