ភ្នំពេញ៖ ស្របពេលរាជរដ្ឋាភិបាល មានចក្ខុវិស័យទៅថ្ងៃអនាគតក្នុងការអភិវឌ្ឍសេដ្ឋកិច្ច និង​សង្គម​ ឆ្ពោះទៅរកប្រទេសសេដ្ឋកិច្ចឌីជីថល។ សហគ្រិនខ្មែរ នៃក្រសួងសេដ្ឋកិច្ច និងហិរញ្ញវត្ថុ បាន​លើក​ទឹកចិត្តដល់ក្រុមយុវជន បង្កើន​ការ​ផ្សព្វផ្សាយ​ចំណេះ​ដឹងផ្នែក​បច្ចេក​វិទ្យា​ហិរញ្ញ​វត្ថុ​ឲ្យ​កាន់​តែធំ​ទូលាយថែមទៀត ដើម្បីរួមចំណែកក្នុងការធ្វើឌីជីថលភាវូបនីយកម្មសេដ្ឋកិច្ច។

នៅក្នុងពិធីប្រគល់ពានរង្វាន់ប្រកួតប្រជែងស្តីពី ការអប់រំចំណេះដឹងហិរញ្ញវត្ថុ ឆ្នាំ២០២៣ ក្រោម​ប្រធាន​បទ ឈ្វេងយល់ពីបច្ចេកវិទ្យាហិរញ្ញវត្ថុ កាលពីល្ងាចថ្ងៃទី១២ កញ្ញា ឆ្នាំ២០២៣នេះ ឯកឧត្តម​បណ្ឌិត ឈៀង វណ្ណមុនិណ្ឌ នាយកប្រតិបត្តិ នៃសហគ្រិនខ្មែរ បានមានប្រសាសន៍ថា បច្ចុប្បន្ន ការប្រើប្រាស់បច្ចេកវិទ្យា បានក្លាយ​ជា​ផ្នែក​មួយ​នៃ​ជីវិត​ប្រចាំ​ថ្ងៃ​របស់​ប្រជាពលរដ្ឋ​ទៅ​ហើយ ​ដោយស្ដែងចេញតាមរយៈការប្រាស្រ័យទាក់ទងគ្នា, ការទូទាត់ប្រាក់អនឡាញ និង​ការ​ផ្ដល់​សេវា​ពាណិជ្ជ​កម្មអនឡាញជាដើម ដែលកំពុងតែមានការរីកចម្រើនយ៉ាងខ្លាំង។ ជាពិសេស ក្នុង​អំឡុង​ពេល​នៃវិបត្តិជំងឺកូវីដ១៩ វិស័យបច្ចេកវិទ្យាឌីជីថល ក៏ដូចជាបច្ចេកវិទ្យាហិរញ្ញវត្ថុ ត្រូវ​បាន​មើល​ឃើញ​ថា ជាកម្លាំងចលករដ៏មានសក្តានុពលខ្ពស់ ក្នុងការជំរុញកំណើនសេដ្ឋកិច្ចក្នុងតំបន់ និង​ទូទាំង​ពិភពលោក។

លោក ទិត្យ កំរង ស្ថាបនិកក្រុមហ៊ុនឬទ្ធិពល និងអេប កត់លុយ និង​ជា​ស្ថាបនិក​កម្ម​វិធី​ពាន​រង្វាន់​ប្រកួត​ប្រជែង ស្តីពីការអប់រំចំណេះដឹងហិរញ្ញវត្ថុ បានលើកឡើងថា ក្នុងគោល​បំណង​ផ្សព្វផ្សាយ​អំពី​ចំណេះ​ដឹងហិរញ្ញវត្ថុឲ្យកាន់តែទូលំទូលាយទៅដល់ប្រជាជនខ្មែរ លោកបាន​បង្កើត​កម្ម​វិធី​ប្រកួត​ប្រជែង​គំនិតប្រកបដោយភាពច្នៃប្រឌិត ដែលមានលក្ខណៈជាសិល្បៈ ដើម្បីឲ្យ​សារ​អប់រំ​ងាយ​ស្រួល​យល់ និងអាចអនុវត្តបានសម្រាប់ប្រជាពលរដ្ឋគ្រប់កម្រិត។ លោកបន្តថា កម្មវិធីនេះ បាន​ចូលរួមចំណែកយ៉ាងច្រើនក្នុងយុទ្ធសាស្រ្តជាតិ ក្នុងការលើកកម្ពស់ចំណេះដឹងផ្នែកហិរញ្ញវត្ថុ និង​បរិយាបន្នហិរញ្ញវត្ថុដល់ប្រជាជនកម្ពុជា។

សូមបញ្ជាក់ថា កម្មវិធីពានរង្វាន់ការផលិតវីដេអូខ្លី ស្តីពីការអប់រំចំណេះដឹងហិរញ្ញវត្ថុ បានចាប់ផ្តើម និង​ដំណើរការប្រកបដោយជោគជ័យកាលពីឆ្នាំ២០២១ ដែលរៀបចំឡើងដោយក្រុមហ៊ុនឬទ្ធិពល សហការ​រៀបចំដោយសមាគមធនាគារនៅកម្ពុជា សមាគមមីក្រូហិរញ្ញវត្ថុនៅកម្ពុជា ក្រសួង​ប្រៃសណីយ៍ និង​ទូរគមនាគមន៍ ក្រសួងសេដ្ឋកិច្ចនិងហិរញ្ញវត្ថុ តាមរយៈសហគ្រិនខ្មែរ និង​ធនាគារ​អេស៊ីលីដា ភីអិលស៊ីជាដើម៕ អត្ថបទ៖ បូរ៉ាវី