នាយសេនាធិការចម្រុះកូរ៉េខាងត្បូង និងឆ្មាំល្បាតឆ្នេរជប៉ុន បាននិយាយនៅពុធនេះថា កូរ៉េខាង​ជើង​បាន​បាញ់​មីស៊ីលបាលីស្ទីកមួយគ្រាប់នៅក្បែរឆ្នេរសមុទ្ររបស់ខ្លួន ប៉ុន្មានម៉ោងប៉ុណ្ណោះ មុន​មេ​ដឹកនាំ​លោក Kim Jong Un ជួបលោកប្រធានាធិបតី Vladimir Putinនៅប្រទេសរុស្ស៊ី។ 

ពុំមានការបញ្ចេញព័ត៌មានលម្អិតភ្លាមៗទេ អំពីទំហំឬ ចម្ងាយនៃមីស៊ីលនេះ ប៉ុន្តែ​ប្រហែល​៥​នាទី​បន្ទាប់​ពី​ការ​ព្រមានពីការបាញ់នេះ អង្គភាពឆ្មាំជប៉ុន បានរាយការណ៍ថា មីស៊ីលនោះបានធ្លាក់។

ប្រទេសនុយក្លេអ៊ែរកូរ៉េខាងជើង បានបាញ់ជាទៀងទាត់ ចាប់ពីមីស៊ីលរយៈចម្ងាយខ្លី និង​មីស៊ីល​តម្រង់​គោលដៅរហូតដល់មីស៊ីលអន្តរទ្វីបបាលីស្ទីកដ៏ធំ (ICBMs) ដែលមាន​សមត្ថភាព​វាយ​ប្រហារ​ដល់​ទឹក​ដី​សហរដ្ឋអាមេរិក។ 

មីស៊ីលបាលីស្ទីកគ្រប់ប្រភេទ និងសកម្មភាពអាវុធនុយក្លេអ៊ែររបស់កូរ៉េខាងជើង ត្រូវបា​ន​ហាម​ប្រាម​ដោយ​សេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបាន​អនុម័ត​ចុង​ក្រោយ​ មានការគាំទ្រពីដៃគូរបស់ទីក្រុងព្យុងយ៉ាង នៅក្នុងប្រទេសចិន និងរុស្ស៊ី កាល​ពី​ឆ្នាំ​២០១៧​។ 

ចាប់តាំងពីពេលនោះមក ទីក្រុងប៉េកាំង និង ទីក្រុងមូស្គូ បានអំពាវនាវឲ្យបន្ធូរបន្ថយទណ្ឌកម្ម លើ​កូរ៉េខាងជើង ដើម្បីចាប់ផ្ដើមពិភាក្សាផ្នែកការទូត និងជួយសម្រាលស្ថានភាពមនុស្សធម៌៕