អាមេរិក ៖ ជនរងគ្រោះជាង១.០០០នាក់ នៃការវាយប្រហារថ្ងៃទី១១ កញ្ញា នៅតែមិនស្គាល់អត្តសញ្ញាណ ខណៈសហរដ្ឋអាមេរិក កាលពីថ្ងៃចន្ទ (១១ កញ្ញា) បានប្រារព្ធខួបលើកទី២២ នៃការវាយប្រហារនោះ។ 

ពិធីរំលឹកខួបមួយត្រូវបានធ្វើឡើងកាលពីចន្ទ នៅឯវិមានរំលឹកវិញ្ញាណក្ខន្ធ និងសារមន្ទីរជាតិ ១១ កញ្ញា នៅតំបន់ Lower Manhattan ទីក្រុងញូវយ៉ក ជាទីតាំងគោរពវិញ្ញាណក្ខន្ធមនុស្ស២.៩៧៧នាក់ ដែលបានស្លាប់នៅក្នុងការវាយប្រហារកាលពីថ្ងៃទី១១ ខែកញ្ញា ឆ្នាំ២០០១។

សមាគមអ្នកពន្លត់អគ្គិភ័យឯកសណ្ឋាននៃទីក្រុងញូវយ៉ក បានសរសេរសារនៅលើហ្វេសប៊ុកកាលពីថ្ងៃចន្ទថា «នៅពេលដែលអគារប៉មបានបាក់ស្រុតចុះនៅថ្ងៃដ៏អាក្រក់នោះ យើងបានបាត់បង់អ្នកពន្លត់អគ្គិភ័យទីក្រុងញូវយ៉កចំនួន៣៤៣នាក់ ហើយក្នុងរយៈពេលប៉ុន្មានឆ្នាំបន្ទាប់ សមាជិកពន្លត់អគ្គិភ័យញូវយ៉កច្រើនជាង៣៤១នាក់ទៀត បានស្លាប់ដោយសារជំងឺមហារីក និងជំងឺដ៏កម្រ ដែលបណ្តាលមកពីធូលីពុលដោយសារផ្សែងគ្រាប់បែក»។

សហរដ្ឋអាមេរិក បានចាប់ផ្តើមយុទ្ធនាការ «សង្គ្រាមសកលលើអំពើភេរវកម្ម» បន្ទាប់ពីការវាយប្រហារក្នុងឆ្នាំ២០០១មក។ 

គួរបញ្ជាក់ផងដែរថា ក្នុងរយៈពេលប៉ុន្មានឆ្នាំមកនេះ មនុស្សយ៉ាងហោចណាស់៤,៥លាននាក់បានស្លាប់ទូទាំងពិភពលោក ដោយមនុស្សប្រហែលមួយលាននាក់ បានស្លាប់ពីការប្រយុទ្ធដោយផ្ទាល់ ហើយមនុស្ស៣,៥លាននាក់ទៀត បានស្លាប់ដោយប្រយោល មកពី «ការបំផ្លិចបំផ្លាញសេដ្ឋកិច្ច សេវាសាធារណៈ និងបរិស្ថាន» នេះបើយោងតាមរបាយការណ៍ពីគម្រោងចំណាយនៃសង្គ្រាមរបស់សាកលវិទ្យាល័យ ប្រោន សហរដ្ឋអាមេរិក៕