អុីតាលី ៖ ទីភ្នាក់ងារព័ត៌មាន Ansa រាយការណ៍ថា កាលពីថ្ងៃអង្គារម្សិលមិញ ប្រទេសអ៊ីតាលី បានខិតខំព្យាយាមផ្តល់កន្លែងស្នាក់នៅដល់ការមកដល់របស់ជនអន្តោប្រវេស៍ជាង ២.៤៧០នាក់ ពីអាហ្វ្រិកខាងជើង និងតំបន់បាល់កង់ ក្នុងរយៈពេល ២៤ម៉ោងកន្លងមកនេះ ។ 

 ប្រទេសអ៊ីតាលី បានមើលឃើញការមកដល់តាមសមុទ្ររបស់ជនអន្តោប្រវេសន៍ជាង ១០៧.៥០០នាក់ មកទល់នឹងពេលនេះក្នុងឆ្នាំនេះ ធៀបនឹងរយៈពេលតែមួយកាលពីឆ្នាំមុន មានត្រឹមតែប្រហែល ៥៣.០០០នាក់ប៉ុណ្ណោះ ។ 

 ការហក់ឡើងខ្ពស់ការមកដល់ថ្មីនេះ មួយផ្នែកបណ្តាលមកពីការកើនឡើងអនីតិជនគ្មានអាណាព្យាបាល ធ្វើដំណើរតាមសមុទ្រប្រកបដោយគ្រោះថ្នាក់ មកកាន់ប្រទេសអ៊ីតាលី ។ ជនអន្តោប្រវេសន៍ជាង ១២.០០០នាក់ បានធ្វើដំណើរមកដល់អ៊ីតាលី ចាប់តាំងពីថ្ងៃទី ១ ខែមករារហូតមក ។ 

 នៅលើកោះ Lampedusa ជនអន្តោប្រវេសន៍ធ្វើដំណើរចូលមកដល់ បានជួបជុំគ្នានៅតំបន់ក្តៅដែលមានលទ្ធភាពទទួលមនុស្សប៉ុន្មានរយនាក់ប៉ុណ្ណោះ មុនពេលត្រូវបានបញ្ជូនទៅកាន់កោះធំជាងនេះ Sicily ។  

 លោក Emanuele Ricifari គឺជាស្នងការនគរបាលខេត្ត Agrigento ស្ថិតលើកោះ Sicily និយាយថា ពួកយើងមានមនុស្សប្រហែល ២.៨០០នាក់នៅតំបន់ក្តៅ មនុស្សប៉ុន្មានរយនាក់គឺប្រហែលជា ៣០០នៅចន្លោះផែ និងកន្លែងចូលចតផ្សេងទៀត ។ ពួកយើងត្រៀមខ្លួនរួចរាល់នៅតំបន់ក្តៅ ។ ក្រុមកាកបាតក្រហម ត្រៀមខ្លួនស្វាគមន៍មនុស្សទាំងអស់នេះ ៕