លីប៊ី ៖ យន្តហោះដឹកជំនួយមនុស្សធម៌របស់ប្រទេសទួរគី និងប្រទេសអារ៉ាប់រួម បានធ្វើដំណើរមកដល់ប្រទេសលីប៊ី ក្រោយគ្រោះទឹកជំនន់ទ្រង់ទ្រាយធំបង្កឡើងដោយសារតែភ្លៀងធ្លាក់ និងព្យុះ Daniel ហើយមនុស្សចំនួន ១ម៉ឺននាក់ ត្រូវបានគេសង្ស័យថា កំពុងបាត់ខ្លួននៅក្នុងទីក្រុងកំពង់ផែ Derna ស្ថិតតំបន់ភាគខាងកើតប្រទេសលីប៊ី ខណៈដែលចំនួនមនុស្សស្លាប់សរុបបច្វុប្បន្ន បានកើនឡើងជាង ៥.៣០០នាក់ ។ 

 ប្រធានាធិបតីទួរគីលោក Tayyip Erdogan បាននិយាយនៅលើបណ្តាញព័ត៌មានសង្គម X ដែលជាអតីតបណ្តាញព័ត៌មានសង្គម Twitterថា យន្តហោះ ៣គ្រឿង បានដឹកជញ្ជូនក្រុមជួយសង្រ្គោះ ១៦៨នាក់ រថយន្តរុករក និងជួយសង្រ្គោះ ២គ្រឿង និងទូកជួយសង្រ្គោះ ២គ្រឿង ។ 

 លោកបន្តថា សំពត់តង់រាប់ពាន់សំពត់ ម៉ាស៊ីនភ្លើង ស្បៀងអាហារ ផលិតផលអនាម័យ និងសម្លៀកបំពាក់ ត្រូវបានបញ្ជូនទៅកាន់ទីក្រុង Benghazi ផងដែរ ។ 

 ស្របពេលនោះដែរ ប្រទេសអារ៉ាប់រួម បានបញ្ជូនស្បៀងអាហារ ការផ្គត់ផ្គង់គ្រឿងវេជ្ជសាស្រ្ត ទូកជួយសង្រ្គោះ និងជម្រកសំពត់ទង់ទៅកាន់ប្រទេសលីប៊ី ។ នេះបើយោងតាមការសេចក្តីរាយការណ៍របស់ទីភ្នាក់ងារព័ត៌មានផ្លូវការរបស់ប្រទេសមួយនេះ ។ 

 គួរឲ្យដឹងថា ទឹកជំនន់នៅក្នុងប្រទេសលីប៊ី បណ្តាលមកពីព្យុះដ៏ខ្លាំងក្លា បានធ្វើឲ្យផ្ទុះទំនប់ បោកបក់អគារ និងធ្វើឲ្យខូចខាតតំបន់១ភាគ៤នៃទីក្រុងភាគខាងកើត Derna ។ 

 មនុស្សជាង ១ពាន់នាក់ ត្រូវបានរកឃើញថាបានស្លាប់នៅក្នុងទីក្រុង Derna មួយគត់ ហើយក្រុមមន្រ្តី រំពឹងថា ចំនួនមនុស្សស្លាប់សរុប នឹងកើនឡើងខ្ពស់ជាងនេះ ក្រោយព្យុះ Daniel បោកបោកឆ្លងកាត់សមុទ្រមេឌីទែរ៉ាណេ ចូលទៅកាន់ប្រទេសលីប៊ី ដែលញាំញីដោយសារភ្លើងសង្រ្គាមអស់រយៈពេលជាង ១ទសវត្សរ៍មកហើយ ៕