ក្រសួងការពារជាតិកោះតៃវ៉ាន់ បានប្រាប់ថា ខ្លួនបានប្រទះឃើញយន្តហោះកងទ័ពអាកាសចិនចំនួន ២៨គ្រឿងនៅក្នុងតំបន់ការពារដែនអាកាសរបស់ខ្លួន នៅព្រឹកថ្ងៃពុធ (ទី១៣ ខែកញ្ញា) នេះ ដោយនេះជាផ្នែកនៃអ្វីដែលក្រុងតៃប៉ិហៅថា ការរុកគួនជាប្រចាំពីសំណាក់ទីក្រុងប៉េកាំង ចំពេលមានភាពតានតឹងកើនឡើង នៅទូទាំងច្រកសមុទ្រ។

កោះតៃវ៉ាន់ ដែលគ្រប់គ្រងខ្លួនឯងដោយលទ្ធិប្រជាធិបតេយ្យ និងដែលប្រទេសចិនចាត់ទុកថា ជាទឹកដីរបស់ខ្លួននោះ បានរិះគន់នៅប៉ុន្មានឆ្នាំថ្មីៗនេះ ចំពោះសកម្មភាពយោធារបស់ចិន ដែលមានកាន់តែច្រើនឡើងៗ នៅជិតកោះនេះ ខណៈទីក្រុងប៉េកាំង ព្យាយាមប្រកាសអះអាងសិទ្ធិអធិបតេយ្យភាពរបស់ខ្លួន។

ក្រសួងការពារជាតិកោះតៃវ៉ាន់ បាននិយាយថា ចាប់ផ្តើមនៅម៉ោងប្រហែល ៦ព្រឹក ម៉ោងក្នុងស្រុក យន្តហោះចម្បាំងរបស់ចិន រួមទាំងយន្តហោះចម្បាំង J-10 បានហោះចូលទៅក្នុងជ្រុងភាគនិរតីនៃតំបន់កំណត់អត្តសញ្ញាណការពារដែនអាកាសរបស់កោះ ឬ ADIZ។ ក្រសួងបានបន្ថែមថា យន្តហោះចិនមួយចំនួន បានហោះឆ្លងកាត់ច្រក Bashi ដើម្បីធ្វើសមយុទ្ធជាមួយនាវាផ្ទុកយន្តហោះចិន Shandong នៅមហាសមុទ្រប៉ាស៊ីហ្វិក។

ពាក់ព័ន្ធនឹងការលើកឡើងនេះ ក្រសួងការពារជាតិចិន មិនបានឆ្លើយតបភ្លាមៗអ្វីនោះឡើយ ចំពោះសំណើសុំការអត្ថាធិប្បាយ ខណៈដែលក្រសួងរបស់កោះតៃវ់ាន់ បានបញ្ជាក់ទៀតថា កងកម្លាំងរបស់កោះតៃវ៉ាន់ បានតាមដានស្ថានការណ៍ ដោយក្នុងនោះរួមទាំងការបញ្ជូនយន្តហោះទ័ពអាកាសផ្ទាល់ខ្លួន និងការដាក់ឲ្យដំណើរការនូវប្រព័ន្ធការពារដែនអាកាសរបស់ខ្លួន ដោយប្រើឃ្លាធម្មតាថា ជាការឆ្លើយតបរបស់ខ្លួន ចំពោះការលុកលុយរបស់ចិនបែបនេះ៕