ប្រទេសរុស្ស៊ី បាននិយាយ នៅថ្ងៃពុធ (ទី១៣ ខែកញ្ញា) នេះ ថា ខ្លួនមានការព្រួយបារម្ភ ចំពោះការបញ្ចេញទឹកវិទ្យុសកម្មរបស់ប្រទេសជប៉ុនចេញពីរោងចក្រថាមពលនុយក្លេអ៊ែរហ្វូគូស៊ីម៉ា (Fukushima) ដែលរងការបំផ្លិចបំផ្លាញ ហើយបានអំពាវនាវឲ្យទីក្រុងតូក្យូផ្តល់ព័ត៌មានលម្អិតអំពីដំណើរការនេះ។

សូមបញ្ជាក់ថា ប្រទេសជប៉ុនបានចាប់ផ្តើមបញ្ចេញទឹកមានសារធាតុវិទ្យុសកម្ម ដែលធ្វើប្រព្រឹត្តិកម្មរួចហើយពីរោងចក្រហ្វូគូស៊ីម៉ាចូលទៅក្នុងមហាសមុទ្រប៉ាស៊ីហ្វិក កាលពីខែមុន ហើយការធ្វើបែបនេះ បានប្រឈមនឹងការរិះគន់ឥតសំចៃពីប្រទេសចិន ដែលបានសម្រេចហាមឃាត់ការនាំចូលអាហារសមុទ្រគ្រប់យ៉ាងពីជប៉ុនភ្លាមៗ។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា មានការខ្វះខាតនូវតម្លាភាពពីទីក្រុងតូក្យូ ជុំវិញបញ្ហានេះ ដោយលោកស្រី Zakharova បានប្រាប់សារព័ត៌មានថា៖ «យើងមើលមិនឃើញពីតម្លាភាព ឬការបើកចំហណាមួយពីទីក្រុងតូក្យូនោះឡើយ»។

លោកស្រី Zakharova បានបន្ថែមថា លោកស្រីសង្ឃឹមថា ប្រទេសជប៉ុននឹងផ្តល់ព័ត៌មានលម្អិត និងផ្អែកលើមូលដ្ឋានវិទ្យាសាស្ត្រសំខាន់ៗទាំងអស់ដល់ប្រទេស ដែលមានក្ដីបារម្ភពីការបង្ហូរទឹក។

តែយ៉ាងណាក្ដី ប្រទេសជប៉ុន និយាយថា ការបញ្ចេញទឹកនេះ មានសុវត្ថិភាព ដោយកត់សម្គាល់ថា ទីភ្នាក់ងារថាមពលអាតូមិកអន្តរជាតិ (IAEA) ក៏បានសន្និដ្ឋានដែរថា ផលប៉ះពាល់ ដែលទឹកនេះនឹងមានទៅលើមនុស្ស និងបរិស្ថាន គឺ «តិចតួចណាស់»៕