យោងតាមប្រភពពីផ្នែកវេជ្ជសាស្ត្រ បានឲ្យដឹងថា ការវាយឆ្មក់តាមអាកាស លើតំបន់Darfur ដែល​ការ​បំផ្លាញ​ដោយសង្គ្រាមរបស់ប្រទេសស៊ូដង់ បណ្តាល​ឲ្យ​មនុស្ស​យ៉ាង​ហោច​ណាស់​៤០​នាក់​ស្លាប់ ​កាលពីថ្ងៃពុធ ខណៈ​ប្រធាន​បេសកកម្ម​អង្គការ​សហប្រជាជាតិ​ប្រចាំ​ប្រទេស​នេះ​លាលែង​ពី​តំណែង​។

លោក Volker Perthes ជាបុគ្គលដែលពុំត្រូវបានស្វាគមន៍ដោយអាជ្ញាធរស៊ូដង់ ចាប់តាំង​ពី​ខែ​មិថុនា​មក បានព្រមានជាថ្មីម្តងទៀតដល់ក្រុមប្រឹក្សាសន្តិសុខអង្គការសហប្រជាជាតិ នៅ​ក្នុង​សន្និសីទ​សារព័ត៌មានចុងក្រោយរបស់លោកមុនពេលចាកចេញពីតំណែងថា ហានិភ័យ​នៃ​សង្គ្រាម​នៅ​ស៊ូដង់ កាន់តែយ៉ាប់យ៉ឺនបន្ថែមទៀត។

ប្រភពផ្នែកវេជ្ជសាស្ត្របានប្រាប់សារព័ត៌មាន AFP ពីមន្ទីរពេទ្យមួយកន្លែងក្នុងក្រុង Nyalafa នៃ​តំបន់ Darfur ខាងត្បូងថា ជនស៊ីវិល៤០នាក់ បានស្លាប់នៅក្នុងការយប្រហារតាមអាកាស ដែល​បាន​ធ្លាក់​លើ​ទីផ្សារ២កន្លែង និងតំបន់ជិតខាងទីក្រុងមួយចំនួនទៀត។

យោងតាមការសន្និដ្ឋាន ពីគម្រោងទីន្ន័យព្រឹត្តិការណ៍ និងតំបន់ជម្លោះប្រដាប់អាវុធ បានឲ្យដឹងថា ចាប់​តាំងពីការប្រយុទ្ធគ្នាចាប់ផ្តើមនៅថ្ងៃទី១៥ ខែមេសា រវាងកងទ័ពជាតិ ដឹកនាំដោ​យ​ឧត្តម​សេនីយ៍ ​លោក Abdel Fattah al-Burhan និងកងកម្លាំងគាំទ្ររហ័សយោធាប៉ារ៉ា (RSF) ដែល​ត្រូវ​បាន​បញ្ជា​ដោយអតីតមេបញ្ជាការរងរបស់លោក Burhan គឺលោក Mohamed Hamdan Daglo ​មនុស្សជិត៧.៥០០នាក់ បានស្លាប់។

យោងតាមតួលេខរបស់អង្គការសហប្រជាជាតិបានឲ្យដឹងថា មនុស្ស​ជាង​៥​លាន​នាក់​បាន​ជម្លៀស​ខ្លួន​ចេញ រួមទាំង១លាននាក់ដែលបានភៀសខ្លួនឆ្លងកាត់ព្រំដែន៕