កំពង់ចាម៖ មន្ត្រីជលផលកំពង់ចាម បានឱ្យដឹងថា សត្វផ្សោតញីមួយក្បាលបានងាប់ តាមការសន្និដ្ឋាន គឺដោយសារតែវ័យចាស់ ។

សាកសពសត្វផ្សោតនេះ ត្រូវបានប្រជានេសាទប្រទះឃើញអណ្ដែតទឹក ទន្លេមេគង្គកំពង់ចាម ក្នុងភូមិសាស្ត្រឃុំឫស្សីស្រុក ស្រុកស្រីសន្ធរ កាលពីថ្ងៃទី១៣ ខែកញ្ញាម្សិលមិញ ។

លោក អ៊ុក ណារិន នាយខណ្ឌជលផលកំពង់ចាម បានឱ្យដឹងថា ក្រុមការងារស្រាវជ្រាវនៃរដ្ឋបាល ជលផល ​និងមន្ត្រីអង្គការ WWF ​បានចុះពិនិត្យស្ថានភាពសាកសពសត្វផ្សោត ​ដែលងាប់នេះ ក្រោយទទួលបានសេចក្ដីរាយការណ៍​ពីប្រជានេសាទ ។

លោក បានបញ្ជាក់ថា ផ្សោតញី​ដែលងាប់នេះ ​មានលេខសម្គាល់០៨៧ ​មានអាយុប្រមាណ២៧ឆ្នាំ មានទម្ងន់១០៥គីឡូក្រាម​ មានប្រវែង២,១០ម៉ែត្រ​ ។

បើតាមការសន្និដ្ឋានរបស់មន្ត្រីជំនាញ ​គឺវាបានងាប់រយៈពេល៤ទៅ៥ថ្ងៃហើយ ៕