ម៉ារ៉ុក ៖ នៅក្នុងភូមិតូចមួយក្នុងប្រទេសម៉ារ៉ុក អ្នកស្រុកជាច្រើននិយាយថាពួកគេកំពុងរងទុក្ខវេទនា ខណៈមនុស្សរាប់ពាន់នាក់បានបាត់បង់លំនៅឋានរបស់ពួកគេ នៅក្នុងគ្រោះរញ្ជួយដីដែលបានវាយប្រហារលើភ្នំដ៏ខ្ពស់ Atlas កាលពីថ្ងៃសុក្រ (៨ កញ្ញា)។ 

អ្នកនៅរស់រានមានជីវិត កំពុងជួបការលំបាកក្នុងការស្វែងរកទីជម្រក ខណៈមនុស្សជាច្រើននាក់ កំពុងជ្រកកោននៅកន្លែងផ្សេងៗ រួមទាំងសាលារៀនក្នុងស្រុកផងដែរ។

ផ្លូវនៅតែត្រូវបិទដោយបំណាក់ដីធំៗ បន្ទាប់ពីមានរញ្ជួយដីកម្រិត៦,៨វ៉ិចទ័រ ហើយមានការខ្វះខាតនៃការផ្គត់ផ្គង់សំខាន់ៗ ដូចជាតង់ជាដើម។ អ្នករស់រានមានជីវិតម្នាក់ឈ្មោះ Ehouline Erkouch វ័យ៦០ ឆ្នាំបាននិយាយថា «ពួកយើងបានរងគ្រោះ ហើយនៅតែមានភាពសោកសៅ ព្រោះយើងគ្មានអាហារ គ្មានកន្លែងសម្រាកស្រួលបួលនោះទេ។ 

យើងមិនសោកស្ដាយលំនៅឋានដែលបាក់បែកនោះទេ ព្រោះវាអាចសាងសង់សារជាថ្មីបាន ប៉ុន្តែអ្វីដែលខ្ញុំលោកស្ដាយខ្លាំងបំផុតនោះ គឺខ្ញុំបានបាត់បង់ឆាកជីវិតរស់នៅប្រចាំថ្ងៃរបស់ខ្ញុំ»។

មនុស្សរាប់ពាន់នាក់បានស្លាប់ក្នុងគ្រោះរញ្ជួយដីនេះ និងជាច្រើននាក់ទៀតបានរងរបួស។ ហេតុការណ៍នោះជាគ្រោះធម្មជាតិដែលមានមនុស្សស្លាប់ច្រើនបំផុតរបស់ប្រទេសម៉ារ៉ុក ចាប់តាំងពីឆ្នាំ១៩៦០មក និងមានឥទ្ធិពលបំផុតចាប់តាំងពីឆ្នាំ១៩០០មក។ 

កងទ័ពរបស់ប្រទេសម៉ារ៉ុកកំពុងដឹកនាំកិច្ចខិតខំប្រឹងប្រែងសង្គ្រោះ គាំទ្រដោយក្រុមជំនួយ និងក្រុមសង្គ្រោះ ដែលបញ្ជូនដោយប្រទេសផ្សេងទៀតផងដែរ។

អ្នកនៅរស់រានមានជីវិតខ្លះ បានសម្តែងការខកចិត្តលើល្បឿនដ៏យឺតនៃប្រតិបត្តិការឆ្លើយតបបន្ទាន់ដំបូង។ ជំរំតង់ជាច្រើនកំពុងត្រូវបានបង្កើតឡើង ឬពង្រីកបន្ថែមទៀត មន្ទីរពេទ្យមានភាពមមាញឹក ហើយមានឧទ្ធម្ភាគចក្រជាច្រើនគ្រឿង កំពុងហោះហើរស្វែងរកអ្នកនៅរស់។ ក្នុងពេលជាមួយគ្នានេះ នៅតំបន់ដាច់ស្រយាលមួយចំនួន នៅតែមានសញ្ញាតិចតួចប៉ុណ្ណោះនៃជំនួយពីខាងក្រៅ៕