អាមេរិក ៖ អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គុយតឺរេស (Antonio Guterres) នឹងពិភាក្សាអំពីការបន្តកិច្ចព្រមព្រៀងគ្រាប់ធញ្ញជាតិជាមួយរដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ (Sergey Lavrov) ប្រធានាធិបតីទួរគី លោក តាយីប អេរដូហ្គែន (Tayyip Erdogan) និង ប្រធានាធិបតីអ៊ុយ ក្រែនលោក វ្ល៉ាឌីមៀ ហ្សេឡិនស្គី (Vladimir Zelensky) នៅសប្តាហ៍ក្រោយ។ ការពិភាក្សា នឹងធ្វើឡើងនៅក្នុងកិច្ចប្រជុំតទល់ដែលជាផ្នែកនៃជំនួបកម្រិតខ្ពស់ក្នុងសប្តាហ៍ នៅមហាសន្និបាតអង្គការសហប្រជាជាតិនៅសប្តាហ៍ក្រោយ។ 

លោកបានថ្លែងប្រាប់សន្និសីទសារព័ត៌មានដែលឆ្លើយតបទៅនឹងសំណួរពាក់ព័ន្ធមួយថា៖«សប្តាហ៍ក្រោយខ្ញុំនឹងទទួលលោកប្រធានាធិបតីហ្សេឡិនស្គី លោកប្រធានាធិបតីអេរដូហ្គែន និងលោករដ្ឋមន្រ្តីឡាវរ៉ូវ ហើយច្បាស់ណាស់ សំណួរនេះ នឹងស្ថិតនៅលើតុនៃការពិភាក្សារបស់យើង»។

លោកហ្គុយតឺរេស បានបញ្ជាក់ថា លោកនឹងធ្វើការទំនាក់ទំនងដាច់ដោយឡែកជាមួយក្រុមអ្នកតំណាងនៃសហព័ន្ធរុស្ស៊ី អ៊ុយក្រែន និងទួរគី ហើយមិនមានគម្រោងប្រមូលផ្តុំពួកគេជាមួយគ្នានោះទេ។

លោក បានបន្ថែមថា៖«ខ្ញុំនៅតែប្តេជ្ញាចិត្តធ្វើអ្វីៗគ្រប់យ៉ាងដែលអាចធ្វើទៅបាន ដើម្បីបង្កើតគំនិតផ្តួចផ្តើមសមុទ្រខ្មៅ ការនាំចេញស្បៀងអាហារអ៊ុយក្រែន និងបន្តការងាររបស់យើងទាក់ទងនឹងការសម្របសម្រួលក្នុងរបបដាក់ទណ្ឌកម្មនៃផលិតផលអាហារ និងជីរបស់រុស្ស៊ី»។