អ៊ីរ៉ង់ ៖ ការតវ៉ាទ្រង់ទ្រាយធំ ជុំវិញការទាមទារសេរីភាពរបស់ស្ត្រី នៅអ៊ីរ៉ង់ បានស្ងប់ស្ងាត់នៅក្នុងប្រទេស នាឆ្នាំនេះ គិតចាប់តាំងពីអ្នកនាង Mahsa Amini បានស្លាប់ក្រោមការឃុំខ្លួនរបស់នគរបាលសីលធម៌។

នៅមុនថ្ងៃគម្រប់ខួប ១ឆ្នាំនៃការស្លាប់របស់នាង អាជ្ញាធរអ៊ីរ៉ង់ត្រូវបានគេរាយការណ៍ថា កំពុងតាមឃ្លាំមើលពីសញ្ញានៃការមានភាពចលាចល។ ថ្ងៃសៅរ៍ទី១៦ ខែកញ្ញានេះ មានរយៈពេល ១ឆ្នាំហើយ ចាប់តាំងពីនារីវ័យ ២២ឆ្នាំ Mahsa Amini បានស្លាប់នៅក្នុងមន្ទីរឃុំឃាំងនគរបាលសីលធម៌របស់ប្រទេសអ៊ីរ៉ង់ បន្ទាប់ពីត្រូវបានចាប់ខ្លួនពីបទមិនពាក់ស្បៃរុំមុខ ឬហ៊ីចាប។

ការស្លាប់របស់អ្នកនាង Aminiៃ ដែលអាជ្ញាធរអ៊ីរ៉ង់ បានពន្យល់ហេតុផលថា ដោយសារគាំងបេះដូងនោះ បាននាំឲ្យការតវ៉ាផ្ទុះឡើងនៅតាមដងផ្លូវ និងសាកលវិទ្យាល័យនានានៃប្រទេសអ៊ីរ៉ង់។ សាក្សីបានចោទប្រកាន់ថា កញ្ញា Amini ត្រូវបានគេវាយដំយ៉ាងធ្ងន់ធ្ងរ បន្ទាប់ពីត្រូវបានចាប់ឃុំខ្លួន។

តែយ៉ាងណាក្ដី អាជ្ញាធរបានចាប់ផ្ដើមបង្ក្រាបការតវ៉ានេះ ដែលជាលទ្ធផលបណ្តាលឲ្យមនុស្ស ៥០០នាក់ ត្រូវបានសម្លាប់ ដោយក្នុងនោះមានអនីតិជនចំនួន ៧១នាក់ផងដែរ។ ក្រៅពីនេះទៀត មនុស្សជាង ២២.០០០នាក់ ត្រូវបានចាប់ឃុំខ្លួន មុនពេលការតវ៉ានេះ បានចាប់ផ្ដើមថមថយកម្សួលបន្តិចម្តងៗ ក្នុងឆ្នាំ២០២៣ នេះ។

មេដឹកនាំអ៊ីរ៉ង់ បានបន្ទោសថាមកពីឥទ្ធិពលរបស់លោកខាងលិច ទើបបង្កឲ្យកើតជាកំហឹងសាធារណៈ ដោយសារការស្លាប់របស់កញ្ញា Amini នេះ។ មានសេចក្ដីរាយការណ៍ថា មន្ត្រីអ៊ីរ៉ង់បានបង្កើនកិច្ចប្រឹងប្រែងរបស់ខ្លួនកាន់តែខ្លាំងឡើង ដើម្បីទប់ស្កាត់ការបោះបោរ នៅមុនការជួបជុំ នាពេលខាងមុខណាមួយ ក្នុងថ្ងៃគម្រប់ខួបនៃការស្លាប់របស់អ្នកនាង Mahsa Amini៕