ស៊ែរប៊ី ៖ ប្រទេសស៊ែរប៊ី បានបញ្ជូនកងកម្លាំងពិសេសទៅកាន់ព្រំដែនជាមួយប្រទេសហុងគ្រី ខណៈដែលជនអន្តោប្រវេសន៍រាប់រយនាក់ក្នុងមួយៗថ្ងៃ ព្យាយាមចូលទៅសហភាពអឺរ៉ុប។

ដោយប្រទេសស៊ែរប៊ី ស្ថិតនៅលើផ្លូវដ៏សំខាន់សម្រាប់ជនភៀសខ្លួនមកពីអាស៊ី អាហ្រ្វិក និងមជ្ឈិមបូព៌ា ដែលភាគច្រើនឆ្លងកាត់ប្រទេសទួរគី នគរបាល បានឈរជើងនៅព្រំដែនយូរមកហើយ។

ប៉ុន្តែបច្ចុប្បន្ន ពួកគេបានបញ្ជូនបុគ្គលិកប្រដាប់អាវុធធុនធ្ងន់បន្ថែមទៀត បន្ទាប់ពីអ្វីដែលអង្គការក្រៅរដ្ឋាភិបាលមួយ បាននិយាយថា ជាសង្គ្រាមក្នុងចំណោមក្រុមឧក្រិដ្ឋជន ហើយប្រធាននគរបាលម្នាក់ បាននិយាយថា គឺជាជម្លោះក្នុងចំណោមជនអន្តោប្រវេសន៍។

កាលពីថ្ងៃអង្គារ នគរបាល បាននិយាយថា ពួកគេបានចាប់ខ្លួនជនអន្តោប្រវេសន៍ចំនួន ៣៧១នាក់នៅតាមព្រំដែន។ រូបភាពវីដេអូ របស់សារព័ត៌មានរ៉យទ័រ បានបង្ហាញឲ្យឃើញថា បុរសពីរនាក់ត្រូវបានឃុំខ្លួននៅក្នុងតង់មួយ ហើយមនុស្សរាប់សិបនាក់ រួមទាំងគ្រួសារដែលមានកូនពីរនាក់ ត្រូវបានប្រមូលផ្តុំគ្នានៅវាលស្រែមួយកន្លែង។

លោក Dragan Vasiljevic អនុប្រធាននគរបាលស៊ែរប៊ី បានប្រាប់សារព័ត៌មានរ៉យទ័រថា ពួកគេក៏បានឃុំខ្លួនមនុស្សមួយចំនួនដែលត្រូវបានឃើញឡើងដើមឈើ ដោយសង្ស័យថា ពួកគេ បានធ្វើជាអ្នកស៊ើបការណ៍យកព័ត៌មានឲ្យក្រុមជនអន្តោប្រវេសន៍ផ្សេងទៀត។ 

ក្រុមជនអន្តោប្រវេសន៍នៅក្នុងតំបន់នេះ ជាធម្មតា ព្យាយាមប្រើជណ្ដើរ ដើម្បីឆ្លងព្រំដែន ឬកាត់របង។