គណៈកម្មាធិការអចិន្ត្រៃយ៍ជាតិ ទទួលបន្ទុកគ្រប់គ្រងនិងបង្ការគ្រោះមហន្តរាយរបស់ប្រទេសវៀតណាម បាននិយាយនៅថ្ងៃព្រហស្បតិ៍នេះថា អ្នកស្លាប់ដោយសារទឹកជំនន់ដ៏គំហុក និងបំណាក់ដី ដែលបានអូសបន្លាយពេល បានកើនឡើងដល់៥នាក់ ខណៈ៤នាក់ផ្សេងទៀត នៅបាត់ខ្លួននៅឡើយ នៅតំបន់ភ្នំភាគខាងជើងប្រទេសវៀតណាម។

យោងតាមគណៈកម្មការ បានឲ្យដឹងថាក្នុងខេត្ត Lao Cai លំនៅឋាន ១៣ខ្នងបានបាក់រលំ ឬត្រូវបានបំផ្លាញ។ ដីកសិដ្ឋានជិត១៥០ហិចតា និងកសិដ្ឋានចិញ្ចឹមត្រី៦១កន្លែង ក៏ត្រូវបានបំផ្លាញ។

ការបំផ្លាញសរុប នៅក្នុងខេត្ត ត្រូវបានប៉ាន់ប្រមាណថាមានចំនួន ២៥៥ពាន់លានដុងវៀតណាម ស្មើនឹង ១០,៥ លានដុល្លារ។

ទឹកជំនន់ និងបំណាក់ដី ក៏បានបំផ្លាញលំនៅឋាន៩ខ្នង និងបានជន់លិចដីស្រែចំការបន្លែជិត ៣០ហិចតា ក្នុងខេត្ត Ha Giang និងខេត្ត Yen Bai។