ភ្នំពេញ៖ តាមការគ្រោងទុកអាជ្ញាធរជាតិដោះស្រាយវិវាទក្រៅប្រព័ន្ធតុលាការ នឹងចាប់ផ្តើមអនុវត្តជាផ្លូវការ នៅចុងខែនេះ ឬដើមខែក្រោយ ។ នេះបើតាមការឱ្យដឹងពីមន្ត្រីជាន់ខ្ពស់ក្រសួងយុត្តិធម៌ ។

ក្នុងសិក្ខាសាលាពិគ្រោះយោបល់ជាមួយគ្រប់ភាគីពាក់ព័ន្ធទាំងអស់ រួមទាំងអង្គការសង្គមស៊ីវីល ស្តីពី ព្រះរាជក្រឹត្យ ស្តីពី ការបង្កើតការរៀបចំ​ និងកិច្ចដំណើរការ​របស់​អាជ្ញាធរជាតិដោះស្រាយវិវាទ​ក្រៅប្រព័ន្ធតុលាការ ​នៅកម្ពុជា” ដែលបានធ្វើឡើងនៅព្រឹកថ្ងៃទី១៤ ​ខែកញ្ញានេះ ឯកឧត្តម ជិន ម៉ាលីន រដ្ឋលេខាធិការក្រសួងយុត្តិធម៌ បានប្រាប់អ្នកសារព័ត៌មានថា ការរៀបចំសិក្ខាសាលា ធ្វើឡើងក្នុងគោលបំណង នឹងបង្កឱកាសដល់គ្រប់តួអង្គពាក់ព័ន្ធ ​បានចូលរួមផ្តល់ជាធាតុចូល និង​មតិយោបល់បន្ថែមទៀត ​ដើម្បីឱ្យព្រះរាជក្រឹត្យ​មានខ្លឹមសារគ្រប់ជ្រុងជ្រោយ និងធានាបាន​នូវប្រសិទ្ធភាព​ដល់ការអនុវត្ត ។

នៅក្នុងកិច្ចប្រជុំពេញអង្គគណៈរដ្ឋមន្ត្រី លើកទី១ កាលពីថ្ងៃទី២៤ ខែសីហា ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ​បានប្រកាសដាក់ចេញនូវវិធានការគន្លឹះ ​ពាក់ព័ន្ធ​ការពង្រឹង ,លើកកម្ពស់គុណភាព និងប្រសិទ្ធភាព នៃប្រព័ន្ធយុត្តិធម៌ ដោយបានប្រគល់ភារកិច្ចជូនក្រសួង យុត្តិធម៌​ ក្នុងការរៀបចំផែនការសកម្មភាពជាក់ស្តែង សំដៅធ្វើយ៉ាងណាសម្រេចឱ្យបាននូវកិច្ចការ​អាទិភាព សំខាន់ៗចំនួន៣ រួមមាន៖ ទី១. ការបង្កើតយន្តការដោះស្រាយវិវាទក្រៅប្រព័ន្ធតុលាការ បន្ថែមលើយន្តការ ដែលមានស្រាប់ ដើម្បីជួយសម្រុះ​សម្រួល​ដោះស្រាយ​វិវាទ​ឱ្យបាន​ឆាប់រហ័ស ជាពិសេស វិវាទរបស់ប្រជាពលរដ្ឋនៅមូលដ្ឋាន, ទី២. ការជំរុញ និងពន្លឿនការដោះស្រាយ​រឿងក្តី​នៅតាមតុលាការ ឱ្យបានឆាប់ រហ័យ សំដៅលើកកម្ពស់គុណភាពប្រសិទ្ធភាព នៃការផ្តល់សេវា​យុត្តិធម៌​ជូនប្រជាជន និងទី៣. ការត្រួតពិនិត្យនិងដោះស្រាយភាពមិនប្រក្រតីនៅតាមតុលាការ សំដៅជួយ​ដោះស្រាយរកយុត្តិធម៌ ​ជូនប្រជាពលរដ្ឋ ក៏ដូចជាលើកកម្ពស់តម្លាភាព ​សុចរិតភាព និង​ភាពត្រឹមត្រូវ នៅក្នុងការអនុវត្តច្បាប់ ​និងចំណាត់ការ រឿងក្តីដោយតុលាការ ៕អត្ថបទ៖ ទូច សោភ័ណ