ប្រទេសស៊ែរប៊ី បានបញ្ជូនកងកម្លាំងពិសេសទៅកាន់ព្រំដែនជាមួយប្រទេសហុងគ្រី ស្របពេលដែលក្នុងពេល១ថ្ងៃ មានជនអន្តោប្រវេសន៍រាប់រយនាក់ព្យាយាមធ្វើដំណើរទៅកាន់សហភាពអឺរ៉ុប។

ស្របពេលដែលប្រទេសស៊ែរប៊ី គឺជាផ្លូវដ៏សំខាន់សម្រាប់ជនអន្តោប្រវេសន៍ដែលធ្វើដំណើរមកពីតំបន់អាស៊ី តំបន់អាហ្វ្រិក និងតំបន់មជ្ឈិមបូព៌ា ដើម្បីទៅដល់សហភាពអឺរ៉ុបនោះ ក្រុមនគរបាល ត្រូវបានដាក់ពង្រាយនៅតាមព្រំដែន ប៉ុន្តែបច្ចុប្បន្នពួកគេបានពង្រឹងកម្លាំងបន្ថែមទៀតនៅតាមតំបន់ដែលមានកងកម្លាំងសន្តិសុខស្រាប់ ។

កាលពីថ្ងៃអង្គារកន្លងទៅ ក្រុមនគរបាល និយាយថា ពួកគេបានឃាត់ខ្លួនជនអន្តោប្រវេសន៍ចំនួន ៣៧១នាក់ នៅតាមព្រំដែន ។ បុរស ២នាក់ ត្រូវបានឃាត់ខ្លួននៅក្នុងសំពត់តង់ ហើយមនុស្សរាប់សិបនាក់ផ្សេងទៀត រួមទាំងមនុស្សមួយគ្រូសារ មានកូនក្មេង ២នាក់ បានជួបជុំគ្នានៅតាមវាលស្មៅ ។

លោក Dragan Vasiljevic គឺអគ្គស្នងការរងនគរបាលស៊ែរប៊ី និយាយថា ក្រុមនគរបាល បានផ្តោតសំខាន់លើការងាររក្សាក្រុមជនអន្តោប្រវេសន៍នៅក្នុងមណ្ឌលទទួលជនភៀសខ្លួន និងធ្វើយ៉ាងណាការពារកុំឲ្យមានជម្លោះកើតឡើងនៅក្នុងចំណោមពួកគេ ។

ក្រុមនគរបាល បានបង្ហាញផងដែរកាំភ្លើងវែងស្វ័យប្រវត្តិ ដែលពួកគេបានរកឃើញនៅតំបន់ព្រំដែន ។

យោងតាមការអះអាងរបស់មន្ទីរការពារស្វែងរកសិទ្ធិជ្រកកោន ដែលជាអង្គការក្រៅរដ្ឋាភិបាលរបស់ស៊ែរប៊ី បានឲ្យដឹងថា ជនអន្តោប្រវេសន៍ប្រហែល ១.៥០០នាក់ បានព្យាយាមឆ្លងកាត់ចូលទៅក្នុងប្រទេសហុងគ្រីជារៀងរាល់ថ្ងៃ ហើយភាគច្រើននៃពួកគេបានផ្តល់ប្រាក់ដល់ក្រុមអ្នករត់ពន្ធមនុស្សខុសច្បាប់ ដើម្បីធ្វើដំណើរឆ្លងកាត់ព្រំដែន ។

ដោយឡែក យោងតាមតួលេខផ្លូវការរបស់រដ្ឋាភិបាលស៊ែរប៊ី បានឲ្យដឹងថាមាននូវជនអន្តោប្រវេសន៍ប្រហែល ៣.៣២៦នាក់ ស្ថិតនៅក្នុងមជ្ឈមណ្ឌលទទួលជនភៀសខ្លួនស៊ែរប៊ី ប៉ុន្តែនៅមានពួកគេជាច្រើនទៀត ពុំទទួលបានកន្លែងស្នាក់នៅនោះទេនៅតាមទីតាំងបែបនេះ ហើយគេអាចមើលឃើញពួកគេនៅតាមផ្លូវនៅក្នុងរដ្ឋធានី Belgrade និងតាមបណ្តោយព្រំដែនប្រទេសហុងគ្រី ៕