ប្រតិបត្តិករនាវា និងសេវាកម្មជួយសង្រ្គោះនិយាយថា នាវាកម្សាន្តប្រណីត ដឹកមនុស្ស ២០៦នាក់ បន្តជាប់ដដែលនៅតំបន់ដាច់ស្រយាលលើកោះ Greenland កាលពីថ្ងៃពុធ ក្រោយបើកកឿងកាលពីដើមសប្តាហ៍នេះ ។

 មេបញ្ជាការចម្រុះតំបន់អាក់ទិក(JAC)របស់យោធាដាណឺម៉ាក បាននិយាយកាលពីថ្ងៃអង្គារថា ទឹលជោរ មិនអាចជួយរំដោះឲ្យនាវា Ocean Explorer ប្រវែង ១០៤ម៉ែត្រមួយគ្រឿងនេះ រួចផុតពីការជាប់កឿងបាននោះទេ ។

 ក្រុមហ៊ុន Aurora Expeditions ដែលជាប្រតិបត្តិករនាវាកម្សាន្តអូស្រ្តាលីមួយគ្រឿងនេះ និយាយថា អ្នកដំណើរ និងក្រុមនាវិក មានសុវត្ថិភាពទេនៅលើនាវា ។

 នាវាមួយគ្រឿងនេះ បានបើកកឿង កាលពីថ្ងៃចន្ទ ពេលធ្វើដំណើរកម្សាន្តនៅក្នុងឧទ្យានជាតិ Alpefjord ដែលមានចម្ងាយប្រហែល១.៤០០គ.មភាគឦសានរដ្ឋធានី Nuuk នៃកោះ Greenland ជាកន្លែងដែលនាវាជួយសង្រ្គោះជិតបំផុត ត្រូវប្រើពេលច្រើនថ្ងៃទើបអាចធ្វើដំណើរទៅដល់បាន ។

 រូបភាពថតបានដោយយន្តហោះកងកម្លាំងអាកាសដាណឺម៉ាក កាលពីថ្ងៃអង្គារ ឃើញនាវា Ocean Explorer ស្ថិតនៅស្ងៀមដោយមានចំណាំងផ្លាតពីពន្លឺព្រះអាទិត្យ ។

 JAC បាននិយាយថា ពួកគេនៅទាក់ទងជាមួយនាវាក្បែរនោះ ដើម្បីពិនិត្យមើលថាតើពួកគេអាចជួយរំដោះនាវាកម្សាន្តមួយគ្រឿងនេះ បានដែរឬទេ ។

 កោះ Greenland ដែលជាដែនដីពាក់កណ្តាលអធិបតេយ្យភាពរបស់ដាណឺម៉ាក ស្ថិតនៅក្នុងមហាសមុទ្រអាត្លង់ទិកខាងជើង មានប្រជាពលរដ្ឋរស់នៅត្រឹមតែ ៥៧.០០០នាក់នេះ បានទាក់ទាញភ្ញៀវទេសចរជាច្រើនឲ្យមកកម្សាន្តលេងនៅទីនេះ ដោយសារទេសភាពស្អាតដូចកម្រាលព្រំ និងផ្ទាំងទឹកកកដែលគ្របដណ្តប់តំបន់ភាគច្រើនរបស់កោះមួយនេះ ៕