កំពង់ស្ពឺ៖ លោកវរសេនីយ៍ឯក ចាង អ៉ី នាយរង ប្រធានសុខាភិបាលក្នុងប្រតិបត្តិការសមយុទ្ធសុខាភិបាលរួមគ្នារវាងកងទ័ពកម្ពុជា-ចិន ទេវតាសន្តិភាព-ឆ្នាំ២០២៣ ថ្លែងថា សមយុទ្ធទេវតាសន្តិភាពលើកទី១ជាមួយកងទ័ពកម្ពុជានឹងក្លាយជាផ្លែផ្កាសម្រាប់ចំណងមិត្តភាពប្រទេសទាំងពីរ។ 

​ថ្លែងប្រាប់អ្នកសារព័ត៌មាន បន្ទាប់ពីដឹកនាំកងទ័ពរំដោះប្រជាជនចិនមកដល់កម្ពុជា នៅថ្ងៃទី១៤ ខែកញ្ញា ឆ្នាំ២០២៣នេះ លោកវរសេនីយ៍ឯក ចាង អ៉ី នាយរង នាយកដ្ឋានសុខាភិបាលនៃសាកលវិទ្យាល័យសុខាភិបាលកងទ័ពអាកាស និងជាប្រធានសុខាភិបាលសម្រាប់ប្រតិបត្តិការសមយុទ្ធសុខាភិបាលរួមគ្នារវាងកងទ័ពកម្ពុជា-ចិន ដែលមានឈ្មោះថា ទេវតាសន្តិភាព-ឆ្នាំ២០២៣ បានឲ្យដឹងថា សម្រាប់ការចូលរួមធ្វើសមយុទ្ធសុខាភិបាលរួមគ្នារវាងកងទ័ពកម្ពុជា-ចិន គឺកងទ័ពចិនបានប្រើប្រាស់ជើងហោះហើរចំនួន ១២ជើង ដើម្បីដឹកជញ្ជូនកងកម្លាំង និងសម្ភារៈចូលរួមសមយុទ្ធផ្នែកសុខាភិបាលលើកទី១ ជាមួយកងទ័ពកម្ពុជា។ លោកវរសេនីយ៍ឯក បន្តថា សមយុទ្ធលើកដំបូង ដែលកងទ័ពកម្ពុជា-ចិន រៀបចំសមយុទ្ធផ្នែកសុខាភិបាល នាពេលនេះជាលើដំបូងដែលកងទ័ពចិនប្រើប្រាស់ពិសេស ហៅថា Y-19 ជាយន្តហោះសុខាភិបាលរបស់ចិនសម្រាប់បំពេញបេសកកម្មក្នុងសមយុទ្ធទេវតាសន្តិភាព។ 

លោកវរសេនីយ៍ឯក បង្ហាញជំនឿថា សមយុទ្ធលើកទី១នេះនឹងទទួលបានជោគជ័យ រួមទាំងពង្រីងចំណងមិត្តភាពរវាងកងទ័ព និងប្រជាជនទាំងពីរឱ្យកាន់តែរឹងមាំបន្ថែមទៀត។ 

ការធ្វើសមយុទ្ធរួមគ្នារវាងកងទ័ពកម្ពុជា និងចិននេះ គឺដើម្បីអបអរសាទរខួបលើកទី៦៥ឆ្នាំ នៃការបង្កើតចំណងការទូតរវាងកម្ពុជា-ចិន, ដើម្បីលើកកម្ពស់សមត្ថភាព ការផ្លាស់ប្តូរបទពិសោធន៍ក្នុងកិច្ចសហប្រតិបត្តិការផ្នែកសុខាភិបាល ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗឲ្យប្រកបដោយប្រសិទ្ធភាព។ 

សមយុទ្ធនាពេលនេះ មានលក្ខណៈទ្រង់ទ្រាយធំក្រោមប្រធានបទ «ប្រតិបត្តិការសង្គ្រោះសុខាភិបាល មនុស្សធម៌អន្តរជាតិរួមគ្នា នៅតំបន់គ្រោះមហន្តរាយ ខ្យល់ព្យុះ និងទឹកជំនន់ធ្ងន់ធ្ងរ»។ សមយុទ្ធនេះបានរៀបចំធ្វើនៅទីតាំងផ្សេងគ្នា ក្នុងនោះដូចជា ទីបញ្ជាការដ្ឋានទ័ពពិសេស, កងទ័ពជើងគោក, មន្ទីរពេទ្យព្រះកេតុមាលា, ព្រលានយន្តហោះយោធា និងនៅមន្ទីរពេទ្យយោធភូមិភាគទី៤ ខេត្តសៀមរាប៕

អត្ថបទ ៖ សេក ឧត្តម