រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយទៅកាន់អ្នកសារព័ត៌មាន កាលពីថ្ងៃពុធ (ទី១៣ ខែកញ្ញា) អំពី «ដំណាក់កាលថ្មីនៃទំនាក់ទំនង» របស់ប្រទេសលោកជាមួយកូរ៉េខាងជើង។ លោកមិនបានផ្តល់ព័ត៌មានលម្អិតអំពីកិច្ចព្រមព្រៀងសព្វាវុធណាមួយជាមួយកូរ៉េខាងជើងទេ ប៉ុន្តែបែរជាបន្ទោសមេដឹកនាំលោកខាងលិចទៅវិញ ចំពោះការផ្តល់អាវុធដល់អ៊ុយក្រែន។

លោក Lavrov បានអមដំណើរលោកប្រធានាធិបតី វ្ល៉ាឌីមៀរ ពូទីន ទៅកាន់តំបន់ចុងបូព៌ា សម្រាប់ជំនួបជាមួយមេដឹកនាំកូរ៉េខាងជើង លោក គីម ជុងអ៊ុន។ លោកបានចោទមេដឹកនាំលោកខាងលិចថា មិនអើពើ ចំពោះវិបត្តិមនុស្សធម៌ នៅកូរ៉េខាងជើង។ លោកបានបន្តថា «ការបដិសេធទាំងស្រុង» របស់ពួកគេ ក្នុងការមិនចូលរួមក្នុងវិធានការនយោបាយណាមួយ «ធ្វើឲ្យបរាជ័យជាមិនខាន» ដល់ការប៉ុនប៉ងបន្ថែមទៀត ក្នុងការជំរុញឲ្យមានដំណោះស្រាយទណ្ឌកម្ម តាមរយៈក្រុមប្រឹក្សាសន្តិសុខអង្គការសហប្រជាជាតិ។

ជាមួយគ្នានេះ លោក Lavrov ក៏បាននិយាយការពារអ្នកការទូតរុស្ស៊ី និងចិន ដែលបានរារាំងចំពោះសេចក្ដីសម្រេច កាលពីឆ្នាំមុន ប្រឆាំងនឹងកូរ៉េខាងជើង។ លោកបានចោទប្រកាន់បេសកជនលោកខាងលិចថា បានព្យាយាមប្រឌិតរឿងឡើង ដោយបំពានលើការសន្យាផ្តល់ជំនួយមនុស្សធម៌ ក្នុងឆ្នាំ២០០៦ នៅពេលដែលពួកគេបានព្រមព្រៀងជាលើកដំបូងនៅក្នុងក្រុមប្រឹក្សាសន្តិសុខ ដើម្បីដាក់ទណ្ឌកម្ម។

អគ្គលេខាធិការអង្គការសហប្រជាជាតិ លោក Antonio Guterres បាននិយាយថា ប្រជាជនកូរ៉េខាងជើងនៅតែបំពានលើសេចក្ដីសម្រេច ដោយក្នុងនោះរួមទាំងការបាញ់មីស៊ីលចំនួន ២គ្រាប់ កាលពីថ្ងៃពុធ (ទី១៣ ខែកញ្ញា) ផងដែរ។ លោកបានបន្ថែមថា «ទម្រង់នៃកិច្ចសហប្រតិបត្តិការណាមួយ» ជាមួយពួកគេ ត្រូវតែគោរពតាមទណ្ឌកម្មរបស់អង្គការសហប្រជាជាតិ៕