ជំនួយដែលទទួលបានពីការបរិច្ចាគពីកន្លែងផ្សេងៗនៃប្រទេសលីប៊ី នៅថ្ងៃព្រហស្បតិ៍ (ទី១៤ ខែកញ្ញា) នេះ បានទៅដល់ម្តងបន្តិចៗ ក្នុងទីក្រុង Derna ដែលត្រូវបានបំផ្លិចបំផ្លាញ ពោលគឺប៉ុន្មានថ្ងៃបន្ទាប់ពីព្យុះបានវាយប្រហារផ្នែកខ្លះរបស់ប្រទេសនេះ។

ទឹកជំនន់ដ៏គំហុក ដែលកើតឡើងដោយសារព្យុះដ៏មានឥទ្ធិពលមួយ បានបំបាក់ទំនប់ទឹក កាលពីយប់ថ្ងៃអាទិត្យ (ទី១០ ខែកញ្ញា) និងបង្កើតបានជាខ្សែទឹកហូរយ៉ាងសន្ធាប់ ដែលហូរកាត់ទីក្រុង ដោយបានហូរនាំយកអគារច្រើនជាន់ជាច្រើនចូលទៅក្នុងសមុទ្រ ខណៈដែលក្រុមគ្រួសារជាច្រើន កំពុងសម្រាកលង់លក់ នៅខាងក្នុងអាគារនោះ។

ចំនួនអ្នកស្លាប់ ដែលត្រូវបានបញ្ជាក់ដោយមន្ត្រី រហូតមកដល់ពេលនេះ មានភាពខុសប្លែកគ្នា ប៉ុន្តែទាំងអស់មានចំនួនរាប់ពាន់នាក់ ខណៈរាប់ពាន់នាក់ទៀត ស្ថិតនៅក្នុងបញ្ជីអ្នកបាត់ខ្លួន។ អភិបាលក្រុង Derna លោក Abdulmenam al-Ghaithi បាននិយាយថា ការស្លាប់នៅក្នុងទីក្រុងនេះ អាចឡើងដល់ ១៨.០០០នាក់ ទៅ ២០.០០០នាក់ ដោយផ្អែកលើទំហំនៃការខូចខាត។

ប្រធានអង្គការឧតុនិយមពិភពលោក (WMO) បាននិយាយ នៅព្រហស្បតិ៍នេះថា ការស្លាប់ និងរបួស អាចជៀសវាងបាន នៅក្នុងទឹកជំនន់ ដែលបានវាយប្រហារប្រទេសលីប៊ីនេះ ប្រសិនបើប្រទេស ដែលមានការបែកបាក់នេះ មានសេវាកម្មអាកាសធាតុ ដែលអាចចេញការព្រមានជាមុនបាន៕