អគ្គិភ័យដ៏ធំមួយ បានឆេះហាងរាប់រយ នៅផ្សារមួយ ក្នុងរដ្ឋធានីដាក្ការបស់ប្រទេសបង់ក្លាដែស ប៉ុន្តែមិនមានអ្នករងរបួសនោះទេ ខណៈដែលអណ្ដាតភ្លើង បានឆាបឆេះ នៅព្រឹកព្រលឹមថ្ងៃព្រហស្បតិ៍ (ទី១៤ ខែកញ្ញា) មុនពេលហាងទាំងនោះបើកលក់ដូរ។

កម្លាំងទាហាន និងរថយន្តពន្លត់អគ្គិភ័យ បានប្រឹងទប់ទល់ រហូតអាចគ្រប់គ្រងបណ្ដុំអណ្ដាតភ្លើងបាន នៅរសៀលថ្ងៃដដែល។ ក្រុមមន្ត្រីបាននិយាយថា ភ្លើងបានឆេះរីករាលដាលយ៉ាងឆាប់រហ័ស នៅក្នុងផ្សារ Mohammadpur ដោយសារតែទំនិញដែលងាយឆេះជាច្រើន ដូចជាប្រេងឆា និងប្លាស្ទិកជាដើម ដែលត្រូវបានរក្សាទុកនៅទីនោះ។

ម្ចាស់ហាងបានប្រញាប់ប្រញាល់ទៅកាន់ផ្សារនោះ ដោយសង្ឃឹមថា នឹងរក្សាទុកទំនិញមួយចំនួនរបស់ពួកគេ។ តែអ្នកខ្លះបាត់បង់អីវ៉ាន់របស់ពួកគេទាំងអស់។ មន្ត្រីពន្លត់អគ្គិភ័យ បានឲ្យដឹងថា អគ្គិភ័យនេះ ទំនងជាបណ្តាលមកពីការឆ្លងចរន្តអគ្គិសនី៕