ក្រុមអ្នកជំនាញតាមដានសង្រ្គាមនិយាយថា លោកពូទីន បារម្ភថា​កិច្ច​ព្រម​ព្រៀងអាវុធ​ជាមួយ​លោក គីម ជុងអ៊ុន អាច​គំរាម​កំហែង​ដល់​ផែនការ​វាយ​លុក​របស់​លោក​ដែល​រួម​រឹត​ដោយ​ទណ្ឌកម្ម​រួច​ទៅ​ហើយ។ ប៉ុន្តែលោក​នៅមានឱកាស​សម្រាប់​កិច្ច​សហប្រតិបត្តិការ​នៅ​ឡើយ​ទោះ​នៅ​ពេល​បច្ចុប្បន្ន​នេះ​ក៏ដោយ។

ក្រុមអ្នកជំនាញបាននិយាយថា ប្រទេសរុស្ស៊ី​បាន​ប្រសើរ​ឡើង​ក្នុង​ការ​គេច​ចេញ​ពី​ការ​ដាក់​ទណ្ឌ​កម្ម​ជាមួយ​នឹងផ្លូវពាណិជ្ជកម្ម និងច្រកថ្មី។

ក្រុមអ្នកជំនាញ​បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន(Vladimir Putin) មាន​ការ​ព្រួយ​បារម្ភថា កិច្ចព្រមព្រៀងសព្វាវុធជាមួយកូរ៉េខាងជើង អាចធ្វើ​ឲ្យ​គម្រោង​គេច​ពី​ទណ្ឌ​កម្ម​របស់​រុស្ស៊ី ស្ថិតក្នុងគ្រោះថ្នាក់។

យោងតាមវិទ្យាស្ថានសម្រាប់ការសិក្សាសង្រ្គាម (ISW) លោក ពូទីន ទំនងជាកំពុង​ព្យាយាម​ទម្លាក់​ជំនួប​របស់លោកជាមួយមេដឹកនាំកូរ៉េខាងជើង លោក គីម ជុងអ៊ុន (Kim Jong Un) នៅ​ទីក្រុងវ្លាឌីវ៉ូស្តុក(Vladivostok)ថាជា "អព្យាក្រឹត" ដោយសារ​តែការ​ភ័យខ្លាច​ថា​កិច្ច​ព្រម​ព្រៀង​ពាណិជ្ជកម្ម​ដែល​អាច​កើត​មាន​អាច​បង្ក​ឱ្យ​មាន​រលក​ថ្មី​នៃ​ទណ្ឌកម្ម​ពី​សំណាក់​បណ្ដា​ប្រទេស​លោក​ខាង​លិច​។

ក្រុមមន្ត្រី​អាមេរិកបានប្រាប់សារព័ត៌មាន The New York Times កាលពីសប្តាហ៍មុន លោក ពូទីន បានជួបសមភាគីកូរ៉េខាងជើង ក្នុងកិច្ចប្រឹងប្រែងមួយ ដើម្បី​ស្វែង​រក​កិច្ច​ព្រម​ព្រៀង​អាវុធ​ជាមួយ​កូរ៉េ​ខាងជើង ដោយសារកងទ័ពរុស្ស៊ីអស់គ្រាប់រំសេវ និងឧបករណ៍​ផ្សេងៗ​ទៀត​ហើយ​ក្នុង​ជម្លោះ​នៅ​អ៊ុយក្រែន។ ប៉ុន្តែក្រុមអ្នកស្រាវជ្រាវមកពីក្រុមប្រឹក្សាអាត្លង់ទិកបានកត់សម្គាល់ថា រុស្ស៊ី​កាន់​តែ​មានភាពល្អប្រសើរក្នុងការគេចចេញពីការដាក់ទណ្ឌកម្ម តាមរយៈគម្រោងយ៉ាងល្អិតល្អន់ ដែល​អនុញ្ញាត​ឱ្យ​ខ្លួន​នាំ​ចូល​បច្ចេកវិទ្យា​មួយ​ចំនួន​ដែល​ផលិត​ដោយ​សហរដ្ឋ​អាមេរិ​ក​ដើម្បី​ធ្វើ​អាវុធ​៕​