មេដឹកនាំកូរ៉េខាងជើង លោក គីម ជុងអ៊ុន បានបន្តដំណើរ​ទស្សនកិច្ច​ដែល​មិន​នឹក​ស្មាន​ដល់​រប​ស់​លោក ក្នុងប្រទេសរុស្ស៊ីរយៈពេលប៉ុន្មានថ្ងៃទៀត ជាទីដែល​លោក​បាន​ជួប​ជាមួយ​លោក​ប្រធានាធិបតី​ វ្ល៉ាឌីមៀ ពូទីន ដោយគេសង្ស័យថាជាកិច្ចព្រមព្រៀងលក់អាវុធ។

មេដឹក​នាំទាំងពីរបានពិភាក្សាគ្នាអំពីលទ្ធភាពសម្រាប់កិច្ចសហប្រតិបត្តិការយោធាកាលពីថ្ងៃពុធ។ អ្នក​នាំពាក្យវិមានក្រឹមឡាំងបាននិយាយថា លោក ពូទីន ក៏បានទទួលយកការអញ្ជើញពីលោក គីម ដោយក្ដីរីករាយក្នុងការទៅបំពេញទស្សនកិច្ចនៅកូរ៉េខាងជើងផងដែរ។

សហរដ្ឋ​អាមេរិក​បានព្រមានថា ទីក្រុងមូស្គូកំពុងទិញអាវុធសម្រាប់សង្គ្រាមរបស់ខ្លួនលើអ៊ុយក្រែន ហើយ​ជំនួយណាមួយពាក់ព័ន្ធនឹងគ្រឿងយុទ្ធោបករណ៍យោធា នឹងបំពាន​លើ​សេចក្ដី​សម្រេច​របស់​អង្គការ​សហប្រជាជាតិ។

មេដឹកនាំ​កូរ៉េខាងជើងត្រូវបានគេរំពឹងថា នឹងទៅទស្សនាការបង្ហាញនាវាចម្បាំងរុស្ស៊ី ក៏​ដូច​ជា​រោង​ចក្រ​ជា​ច្រើនកន្លែងទៀត ហើយនិងឈប់សំចតនៅភាគខាងកើតទីក្រុង វ្លាឌីវ៉ូស្តុក ពេល​ធ្វើ​ដំណើរ​ត្រឡប់​ទៅ​ប្រទេសខ្លួនវិញ។

កិច្ចប្រជុំ​កាលពីថ្ងៃពុធរវាងរបបដាក់ទណ្ឌកម្មទាំងពីរ បានធ្វើឡើង​នៅ​ពេល​ដែល​ទំនាក់​ទំនង​របស់​ពួក​គេជាមួយលោកខាងលិច ស្ថិតក្នុងកម្រិតទាបបំផុត៕