ម៉ារ៉ុក ៖ ស្របពេលដែលលោក Lamiri Bouchaib ធ្វើដំណើរតាមផ្លូវទៅផ្ទះគ្រួសាររបស់លោក ដើម្បីប្រមែប្រមូលទ្រព្យសម្បត្តិនៅសេសសល់ រលករញ្ជួយដែលបានអង្រួនប្រទេសម៉ារ៉ុក កាលពីព្រឹកថ្ងៃព្រហស្បតិ៍ម្សិលមិញ បានធ្វើឲ្យអគារមួយខ្នងទៀតដួលរលំ ។ 

 លោក Bouchaib ដូចគ្នានឹងប្រជាពលរដ្ឋម៉ារ៉ុកជាច្រើនទៀតដែរដែលបាត់បង់មនុស្សជាទីស្រលាញ់របស់ពួកគេនោះ គ្មានកន្លែងស្នាក់នៅនោះទេ ក្រោយការរញ្ជួយដីដ៏ខ្លាំងក្លា បានសម្លាប់មនុស្សជាង ២ពាន់នាក់ ហើយនិងបានធ្វើខូចខាតស្ទើទាំងស្រុងអគារនៅក្នុងភូមិ Amizmiz របស់គាត់ ដែលស្ថិតនៅជិតចំណុចកណ្តាល ។ 

 បងប្រុសរបស់លោក Bouchaib បាននៅផ្ទះ ពេលដែលការរញ្ជួយដីវាយប្រហារប្រទេសម៉ារ៉ុកកាលពីយប់ថ្ងៃសុក្រសប្តាហ៍មុន ប៉ុន្តែពេលលោក Bouchaib ធ្វើដំណើរមកដល់នៅរយៈពេលប៉ុន្មានម៉ោងក្រោយ លោកមិនអាចជួយអាយុជីវិតបងប្រុសរបស់គាត់បានឡើយ ។ 

 ឈរនៅមុខផ្ទះ រយៈពេល ៧ថ្ងៃក្រោយការរញ្ជួយដី លោក Bouchaib និយាយថា លោកពិតជាក្រៀមក្រំ និងព្រួយបារម្ភខ្លាំងណាស់ ។ 

 ភូមិ Amizmiz ស្ថិតនៅតាមជើងភ្នំ បានប្រែក្លាយជាគំនរបាក់បែក ធ្វើឲ្យប្រជាពលរដ្ឋគ្មានផ្ទះសម្បែងរស់នៅ បាន ស្នាក់នៅក្រោមសំពត់តង់ដែលផ្តល់ជូនដោយក្រុមអាជ្ញាធរ ប៉ុន្តែប្រជាពលរដ្ឋផ្សេងទៀត បានត្រឹមស្នាក់នៅក្រោមជម្រកធ្វើពីភួយប៉ុណ្ណោះ ។ 

 សូមបញ្ជាក់ថា ការរញ្ជួយដីកម្រិត ៦.៨រ៉ិចទ័រ ដែលបានអង្រួននៅតំបន់ភ្នំ High Atlas កាលពីយប់ថ្ងៃសុក្រ បានសម្លាប់មនុស្សយ៉ាងហោច ២.៩០១នាក់ និងមនុស្សជាង ៥.៥៣០នាក់ផ្សេងទៀត បានរងរបួស ហើយធ្វើឲ្យវាក្លាយជាការរញ្ជួយដីសម្លាប់មនុស្សច្រើនបំផុតនៅក្នុងប្រទេសម៉ារ៉ុក ចាប់តាំងពីឆ្នាំ ១៩៦០ និងជាការរញ្ជួយដីដ៏ខ្លាំងក្លាបំផុត ចាប់តាំងពីឆ្នាំ ១៩០០ ៕