ម៉ារ៉ុក ៖ ប្រតិបត្តិករទេសចរណ៍ប្រទេសម៉ារ៉ុកកំពុងអញ្ជើញ និងជំរុញទឹកចិត្តដល់ប្រជាជនឲ្យធ្វើដំណើរទៅកាន់ ទីក្រុង Marrakesh បន្ទាប់ពីរញ្ជួយដីកម្រិត ៦,៨ រិចទ័រវាយប្រហារប្រទេសអាហ្វ្រិកខាងជើងមួយនេះកាលពីថ្ងៃទី៨ ខែកញ្ញា ដើម្បីជួយដល់ឧស្សាហកម្មទេសចរណ៍ ដែលមានសារៈសំខាន់សម្រាប់សេដ្ឋកិច្ចជាតិ។ ប្រក្រតីភាពកំពុងវិលត្រឡប់មកទីក្រុង Marrakesh វិញបន្ទាប់ពីរញ្ជួយដី។ សណ្ឋាគារ និងអាជីវកម្មតូចៗ កំពុងបើកឡើងវិញ ខណៈភ្ញៀវទេសចរបន្តមកដល់។

រញ្ជួយដីបានវាយប្រហារ អំឡុងពេលនៃខែដ៏មមាញឹកបំផុតសម្រាប់វិស័យទេសចរណ៍។ ទោះជាយ៉ាងណា បន្ទាប់ពីរយៈពេល៣ថ្ងៃ នៃការកាន់ទុក្ខជាតិ ទីលាន Jemaa Lifna ដែលមានរូបបដិមា ក្នុងទីក្រុង Marrakesh មានសភាពរស់រវើក និងពេញទៅដោយអ្នកទេសចរ។ អាកាសយានដ្ឋានបានបើក ហើយជើងហោះហើរបន្តជាធម្មតា។ អ្នកដំណើរអន្តរជាតិរាប់ម៉ឺននាក់កំពុងធ្វើដំណើរជារៀងរាល់ថ្ងៃ ដើម្បីមកទស្សនាទីក្រុងដ៏ស្រស់ស្អាតនេះ។ លោក Ines Chihi ប្រតិបត្តិករទេសចរណ៍ជនជាតិបារាំងម្នាក់ និយាយថា សាររបស់លោក ទៅកាន់ពិភពលោកទាំងមូល គឺ ភ្ញៀវទេសចរត្រូវមកទស្សនាប្រទេសម៉ារ៉ុក។ សូមគាំទ្រប្រទេសម៉ារ៉ុក ជាប្រទេសមានសប្បុរស។ រញ្ជួយដី បានបណ្តាលឲ្យមានការបំផ្លាញច្រើន ជាពិសេសនៅខាងក្រៅ ទីក្រុង Marrakesh ។ វាគួឲ្យសោកស្តាយប៉ុន្តែប្រសិនបើយើងចង់ជួយប្រជាជនម៉ារ៉ុក លោកគិតថា យើងត្រូវបន្តមកទស្សនាប្រទេសនេះ។ 

អ្នកមានជំនាញវិជ្ជាជីវៈរាប់ពាន់នាក់ក្នុងទីក្រុង Marrakesh ពឹងផ្អែកលើវិស័យទេសចរណ៍ សម្រាប់ជីវភាពរស់នៅរបស់ពួកគេ។ លោក Tayri ពាណិជ្ជករម៉ារ៉ុក និយាយថាប្រទេសម៉ារ៉ុក មានសុវត្ថិភាព ទោះបីជាបន្ទាប់ពីរញ្ជួយដី។ នេះជាទឹកដីមានសន្តិសុខ សន្តិភាព និងភាពចុះសម្រុងគ្នា។

វិស័យទេសចរណ៍ បានផ្តល់ការងារប្រមាណ ៥៦៥.០០០ ការងារ នៅក្នុងប្រទេសម៉ារ៉ុក។